टोकियो – इरानका सर्वोच्च नेता आयतोल्लाह अली खामेनीको बिहीबार मासहादस्थित पवित्र तीर्थस्थलमा राजकीय सम्मानका साथ अन्त्येष्टि गरिएको छ । गत फेब्रुअरी २८ मा अमेरिका र इजरायलको संयुक्त हवाई आक्रमणमा मारिएका खामेनीको एक हप्ता लामो राष्ट्रिय शोक र विशाल शवयात्रापछि बिहीबार अन्तिम संस्कार गरिएको हो ।
खामेनीलाई अन्तिम बिदाइ गर्न मासहादको सडकमा लाखौँ इरानीहरूको जनसागर उत्रिएको थियो । शोकमा डुबेका सर्वसाधारणहरूले छाती पिट्दै र रुँदै आफ्ना नेताको बिदाइ गरे । सो क्रममा भीडले ‘अमेरिका मूर्दावाद’ जस्ता चर्का नारा लगाउँदै प्रतिशोधको कसम खाएका थिए । खामेनीको शव राखिएको कफिनलाई छुने प्रयासमा हजारौँ मानिसहरू तँछाडमछाड गरिरहेका देखिन्थे ।
खामेनीको अन्त्येष्टि भइरहँदा इरानले खाडी क्षेत्रमा रहेका अमेरिकी सैन्य आधारहरूमा भीषण आक्रमण गरेर प्रतिशोधको संकेत दिएको छ । इरानी सेनाले कुवेत, बहराइन र कतारमा रहेका अमेरिकी सैन्य अखडा र मिसाइल प्रणालीलाई निसाना बनाएको छ । इरानको ‘रिभोलुसनरी गार्ड्स’ ले यो आक्रमण खामेनीको हत्या र अमेरिकी हस्तक्षेपको जवाफ भएको बताएको छ ।
खामेनीको हत्यापछि सुरु भएको द्वन्द्वले तीन हप्ताको अस्थायी युद्धविरामलाई पनि तोडिदिएको छ । राष्ट्रपति डोनाल्ड ट्रम्पले युद्धविराम समाप्त भएको घोषणा गरेलगत्तै मध्यपूर्वमा पूर्णकालीन युद्धको खतरा बढेको छ । इरानले विश्वकै महत्वपूर्ण व्यापारिक मार्ग ‘स्ट्रेट अफ हर्मुज’ मा आफ्नो नियन्त्रण कडा पारेको छ, जसका कारण विश्वभर इन्धन आपूर्ति र मूल्यमा ठूलो हलचल पैदा भएको छ ।
इरानका उच्च अधिकारीहरूले खामेनीको मृत्युको बदला नलिएसम्म विश्राम नलिने घोषणा गरेका छन् । यसले मध्यपूर्वमा मात्र नभई विश्व राजनीतिमै नयाँ र भयावह मोड ल्याउने देखिएको छ ।
