टोकियो – कप्तान किलियन एमबाप्पे र उसमान डेम्बेलेको उत्कृष्ट प्रदर्शनको मद्दतले मोरक्कोलाई २-० ले पराजित गर्दै फ्रान्स फिफा विश्वकप २०२६ को सेमिफाइनलमा प्रवेश गरेको छ । अमेरिकाको बोस्टन स्टेडियममा शुक्रबार बिहान सम्पन्न पहिलो क्वाटरफाइनल खेलमा जित निकाल्दै साविक उपविजेता फ्रान्स लगातार तेस्रो पटक विश्वकपको अन्तिम चारमा पुग्न सफल भएको हो ।
खेलको पहिलो हाफमा मोरक्कन गोलकिपर यासिन बोनोले उत्कृष्ट प्रदर्शन गर्दै फ्रान्सलाई रोकेका थिए । उनले २८औँ मिनेटमा एमबाप्पेको पेनाल्टीसहित तीनवटा उत्कृष्ट बचाउ गरेर मोरक्कोको संकट टारेका थिए । तर, दोस्रो हाफमा फ्रान्सले लय समात्यो । खेलको ६०औँ मिनेटमा डिजायर डुएको पासमा एमबाप्पेले गोल गर्दै फ्रान्सलाई अग्रता दिलाए । त्यसको ६ मिनेट लगतै एमबाप्पेकै पासमा उसमान डेम्बेलेले गोल गरेपछि फ्रान्सको जित सुनिश्चित भयो ।
यो हारसँगै अन्तर्राष्ट्रिय फुटबलमा मोरक्कोको ३४ खेल लामो अपराजित यात्रामा पूर्णविराम लागेको छ । जारी विश्वकपमा ८ गोल र ३ असिस्ट पुर्याउँदै एमबाप्पे सर्वाधिक गोलकर्ता (गोल्डेन बुट) को दौडमा लियोनल मेसीभन्दा अगाडि देखिएका छन् । विश्वकप इतिहासमा एमबाप्पेको कुल गोल संख्या २० पुगेको छ, जुन मेसीको भन्दा मात्र एक गोल कम हो ।
अब फाइनल प्रवेशका लागि फ्रान्सले स्पेन र बेल्जियमबीचको विजेतासँग प्रतिस्पर्धा गर्नेछ ।
