टोकियो – जापानकी प्रधानमन्त्री सानाए ताकाइची आफ्नो ६ दिने युरोप भ्रमणको पहिलो चरणमा आइतबार बेलायतको राजधानी लन्डन आइपुगेकी छिन् । भ्रमणका क्रममा उनले आइतबार राति बेलायती प्रधानमन्त्री कियर स्टारमरसँग महत्वपूर्ण शिखर वार्ता गर्ने कार्यतालिका रहेको छ ।
यसअघि यी दुई नेताबीच गत जनवरीमा टोकियोमा भेटवार्ता भएको थियो । पाँच महिनापछि हुन लागेको यो भेटलाई दुई देशबीचको रणनीतिक र आर्थिक सम्बन्धलाई नयाँ उचाइमा पुर्याउने कसरतका रूपमा हेरिएको छ ।
वार्तापछि दुई देशबीच ‘आर्थिक सुरक्षा’को क्षेत्रमा सहकार्य गर्ने सम्बन्धी एक साझा अवधारणा पत्र सार्वजनिक गर्ने तयारी भइरहेको छ । प्रधानमन्त्री ताकाइचीले विशेषगरी ‘रेयर अर्थ’ जस्ता महत्वपूर्ण खनिज पदार्थको आपूर्तिमा चीनले अपनाउन सक्ने ‘आर्थिक दबाब’ र स्वेच्छाचारी निर्यात नियन्त्रणप्रति चिन्ता व्यक्त गर्ने बुझिएको छ ।
यस्ता चुनौतीहरूको सामना गर्न जापान र बेलायतले महत्वपूर्ण खनिजहरूको उत्खनन, प्रशोधन, पुनर्चक्रण र भण्डारणमा कसरी मिलेर काम गर्ने भन्ने विषयमा ठोस सहमति गर्ने अपेक्षा गरिएको छ ।
बैठकको अर्को मुख्य एजेन्डा ‘अफ-शोर विन्ड’ (तटीय समुद्री वायु ऊर्जा) उत्पादनमा प्राविधिक सहकार्य बढाउनु रहेको छ । यसका साथै, जापान, बेलायत र इटालीले संयुक्त रूपमा विकास गरिरहेको ‘अर्को पुस्ताको लडाकु विमान’ परियोजनाको प्रगति र यसलाई समयमै सम्पन्न गर्ने प्रतिबद्धतालाई पनि दुवै नेताले पुनः पुष्टि गर्नेछन् ।
शिखर वार्तामा मध्यपूर्वको वर्तमान तनावपूर्ण अवस्था र त्यहाँ जारी द्वन्द्वको चाँडो समाधानका लागि दुई देशले खेल्न सक्ने भूमिकाबारे पनि गहन छलफल हुनेछ । बेलायतको भ्रमण सकेपछि प्रधानमन्त्री ताकाइची इटाली प्रस्थान गर्नेछिन्। युरोप भ्रमणको अन्तिम चरणमा उनी फ्रान्समा आयोजना हुने विकसित राष्ट्रहरूको समूह ‘जी-७’ को शिखर सम्मेलनमा सहभागी भएर स्वदेश फर्कने कार्यक्रम छ ।
