काठमाडौँ – सपना प्रधान मल्लले सरकारको दबाब र डरको वातावरणमा निष्पक्ष न्याय सम्भव नहुने बताएकी छन्। ७४औँ कानुन दिवसका अवसरमा शनिबार काठमाडौंमा आयोजित कार्यक्रममा उनले न्यायाधीशहरूलाई निर्भीक भएर काम गर्न आग्रह गरिन्।
राष्ट्रपति रामचन्द्र पौडेल लगायत उच्च पदाधिकारीहरूको उपस्थितिमा उनले दुई तिहाइ बहुमतको सरकार वा महाअभियोगको डरबाट प्रभावित नभई न्याय सम्पादन गर्नुपर्ने धारणा राखिन्। उनले न्यायपालिकाको स्वतन्त्रता जोगाउन साहस आवश्यक रहेको उल्लेख गरिन्। आफूले कानुन व्यवसायी हुँदादेखि नै विभेद र अन्यायविरुद्ध संघर्ष गर्दै आएको स्मरण गर्दै उनले न्याय, संविधानवाद र विधिको शासनको रक्षा गर्न सबै पक्ष एकजुट हुनुपर्ने बताइन्।
मल्लले अहिलेको अवस्थालाई गम्भीर र चुनौतीपूर्ण भन्दै नागरिक अधिकार, न्यायपालिकाको मर्यादा तथा लोकतान्त्रिक मूल्य जोगाउन आम नागरिक, नेपाल बार, सञ्चारमाध्यम र नागरिक समाजलाई पनि सक्रिय भूमिका खेल्न आग्रह गरिन्। उनले राज्यका विभिन्न अंगबीच सहकार्य र समझदारी कायम रहने विश्वाससमेत व्यक्त गरिन्।
