टोकियो – कतिपय रोमान्टिक चलचित्र वा ‘एनिमे’मा कुनै युवकको घरमा अचानक एक युवतीको प्रवेश हुनु प्रेम कथाको सुरुवात मानिन्छ । तर, जापानको कागोसिमा सहरमा बुधबार बिहान घटेको एउटा वास्तविक घटना भने कुनै फिल्मी कथा भन्दा कम विचित्र र उदेकलाग्दो छैन ।
जापानको लामो सार्वजनिक बिदा ‘गोल्डेन विक’को अन्तिम दिन, बुधबार बिहान करिब ६:१० बजे एक २९ वर्षीय युवक आफ्नो घरमा बसिरहेका थिए । त्यही बेला उनको घरभित्र अचानक एक महिला देखा परिन् । ती युवक र महिलाबीच यसअघि कहिल्यै कुनै चिनजान वा भेटघाट भएको थिएन । घरभित्र पसेपछि ती महिलाले ती युवकको गालामा जोडले थप्पड हानिन् ।
थप्पड खाएपछि स्तब्ध भएका युवकले तुरुन्तै जापानको आपतकालीन प्रहरी नम्बर ११० मा फोन गरेर जानकारी दिए । उनले प्रहरीलाई भने, ‘मेरो घरभित्र एकजना मलाई थाहै नभएकी महिला छिन् र उनले मलाई थप्पड हानिन् ।’
प्रहरी घटनास्थल पुग्दा ती ५४ वर्षीया महिला युवकको घरभित्रै बसिरहेकी थिइन्। सोधपुछका क्रममा उनले युवकलाई थप्पड हानेको कुरा सहजै स्वीकार गरिन् । युवकलाई अस्पताल नै भर्ना गर्नुपर्ने गरी गम्भीर चोट नलागे तापनि प्रहरीले ती महिलालाई ‘कुटपिट र आक्रमण’को अभियोगमा तुरुन्तै पक्राउ गरेको छ ।
अनुसन्धानका क्रममा ती महिलाले घरबाट कुनै पनि बहुमूल्य सामान चोरी गर्ने प्रयास नगरेको पाइएको छ । यसबाट उनी केवल थप्पड हान्ने उद्देश्यले मात्रै घरभित्र पसेको देखिएको छ । तर, उनले ती अपरिचित युवकलाई नै किन निशाना बनाइन् भन्ने कुरा अझै रहस्यको गर्भमै छ र प्रहरीले यसबारे अनुसन्धान गरिरहेको छ ।
प्रहरीका अनुसार घरको ढोका वा झ्याल फोडिएको कुनै संकेत भेटिएको छैन । यसबाट ती महिला खुला रहेको ढोकाबाटै भित्र छिरेको अनुमान गरिएको छ । जापानको सुरक्षित छिमेकमा बस्ने धेरै मानिसहरू प्रायः आफ्नो घरको मुख्य ढोकामा ताल्चा नलगाउने गर्छन् । तर, यो घटनाले सुरक्षित भनिएको देशमा पनि जुनसुकै बेला यस्ता अनौठा र डरलाग्दा घटना हुन सक्छन् भन्ने प्रमाणित गरेको छ ।
