टोकियो – जापानका करिब ९२ प्रतिशत प्रमुख कम्पनीहरूले विदेशी कामदार स्वीकार गर्ने गरेको पाइएको छ । सार्वजनिक प्रसारण संस्था एनएचकेले गरेको एक सर्वेक्षणअनुसार, घट्दो जनसंख्याका बीच विशेष सीप भएका जनशक्तिको आवश्यकता पूर्ति गर्न जापानी कम्पनीहरू विदेशी कामदारमा निर्भर हुन थालेका हुन् ।
डिसेम्बर र जनवरीको बीचमा जापानका १०० वटा ठूला स्वदेशी कम्पनीहरूमा गरिएको यस सर्वेक्षणमा ७८ वटा कम्पनीले आफ्नो प्रतिक्रिया दिएका थिए । सर्वेक्षणमा सहभागी झण्डै दुई तिहाइ कम्पनीले विशेष सीप र प्रविधि सुरक्षित गर्न तथा कार्यस्थलमा विविधतामार्फत ‘नवप्रवर्तन’ लाई प्रोत्साहन गर्न विदेशी कामदार भित्र्याएको बताएका छन् । यसका साथै, विश्वव्यापी व्यापार सञ्चालनलाई सुदृढ बनाउन र मुलुकमा व्याप्त श्रम शक्तिको अभाव टार्न पनि विदेशी कर्मचारी सहायक सिद्ध भएको उनीहरूको ठम्याइ छ ।
विदेशी कामदार भित्र्याउँदा आइपर्ने चुनौतीहरूका बारेमा सोधिएको प्रश्नमा कम्पनीहरूले विभिन्न समस्याहरू औँल्याएका छन् :-
- ५१ प्रतिशत कम्पनीले जापानी भाषा र कार्यस्थलको तालिम प्रणालीमा सुधार गर्नुपर्ने आवश्यकता बताएका छन् ।
- ३८ प्रतिशतले भिसा र आवासीय अनुमति (Status of Residence) प्रक्रियालाई थप द्रुत बनाउनुपर्नेमा जोड दिएका छन् ।
- करिब एक तिहाइ कम्पनीले विदेशी कामदारका लागि स्पष्ट ‘करियर ट्र्याक’ (वृत्ति विकास) सुनिश्चित गर्नु चुनौतीपूर्ण रहेको उल्लेख गरेका छन् ।
- २९ प्रतिशतले विदेशी कर्मचारीको दैनिक जीविकोपार्जन र सामाजिक समायोजनमा सहयोग पुर्याउनु पर्ने विषयलाई चुनौतीका रूपमा हेरेका छन् ।
कान्साई युनिभर्सिटी अफ इन्टरनेशनल स्टडीजका भिजिटिङ प्रोफेसर मेन्जु तोसिहिरोले दक्ष जनशक्तिका लागि जापानले अब एसिया र युरोपका अन्य विकसित मुलुकहरूसँग प्रतिस्पर्धा गर्नुपर्ने अवस्था आएको बताएका छन् । उनले भने, ‘विदेशी कामदारलाई जापानी कर्मचारी सरह नै समान आधारमा तालिमको अवसर दिनु अपरिहार्य छ । उनीहरूलाई जापानी भाषा शिक्षा प्रदान गर्ने जिम्मेवारी सरकार वा सम्बन्धित कम्पनीले नै लिनुपर्छ ।’
प्राध्यापक मेन्जुले जापानको वर्तमान अवस्थाबारे सचेत गराउँदै थपे, ‘जापान अहिले यस्तो संवेदनशील मोडमा पुगेको छ, जहाँ पुराना दक्ष जापानी कामदारहरू अवकाश हुनुअघि नै उनीहरूको सीप र प्रविधि विदेशी कामदारमा हस्तान्तरण गरिएन भने जापानले आफ्नो प्राविधिक विशेषज्ञता सधैँका लागि गुमाउन सक्छ ।’ सर्वेक्षणले जापानी अर्थतन्त्रमा विदेशी जनशक्तिको भूमिका अब ऐच्छिक मात्र नभई अनिवार्य बन्दै गएको संकेत गरेको छ ।
