टोकियो – पश्चिमी टोकियोको फुस्सा सहरस्थित बालबालिका सामुदायिक केन्द्र (चिल्ड्रेन सेन्टर)को परिसरमा अमेरिकी सेनाको एउटा प्यारासुट खसेको छ । योकोता एयर बेसमा अमेरिकी सेनाले गरिरहेको नियमित प्रशिक्षण अभ्यासका क्रममा उक्त प्यारासुट हावाको बहावका कारण अनियन्त्रित भई बालबालिका केन्द्रमा खसेको सहरका अधिकारीहरूले मङ्गलबार जानकारी दिएका छन् ।
यस घटनाप्रति गम्भीर आपत्ति जनाउँदै फुस्सा सहरले अमेरिकी सेना र जापानी सरकार दुवैसमक्ष कडा विरोध पत्र बुझाउने तयारी गरेको छ । सौभाग्यवश, यस घटनामा कुनै पनि स्थानीय बासिन्दा घाइते भएको खबर छैन । फुस्सा नगरपालिका र रक्षा मन्त्रालयको नर्थ कान्टो डिफेन्स ब्युरोका अनुसार, घटना नोभेम्बर २० मा भएको हो । प्रशिक्षणका क्रममा तीव्र गतिको हावा चलेपछि प्यारासुटको मार्ग परिवर्तन भएको थियो ।
हावाको बहावका कारण मुख्य प्यारासुट र ‘पाइलट सुट’ (सानो प्यारासुट) अनियन्त्रित भएपछि सम्बन्धित अमेरिकी सैनिकले तिनीहरूलाई आफ्नो शरीरबाट विच्छेद (डिट्याच) गरेका थिए । ती सैनिक भने वैकल्पिक (रिजर्भ) प्यारासुटको मद्दतले बेसभित्रै सुरक्षित अवतरण गर्न सफल भए ।
विच्छेद गरिएको मुख्य प्यारासुट एयर बेसबाट करिब १०० मिटरको दूरीमा रहेको बालबालिका केन्द्रको खेल मैदानमा खसेको थियो । उक्त रात नै अमेरिकी सैन्य अधिकारीहरूले सहर प्रशासन वा केन्द्रको अनुमति नलिई गुपचुप रूपमा प्यारासुट उठाएर लगेको बताइएको छ । यसैगरी, डिसेम्बर १ मा केन्द्रका एक कर्मचारीले भवनको छतमा ‘पाइलट सुट’ फेला पारेका थिए, जसलाई पछि नगरका अधिकारीहरूले संकलन गरेका थिए ।
यो घटना अमेरिकी सेनाको प्यारासुट अभ्यास पुनः सुचारु भएको दिन (नोभेम्बर २०) मै घटेको हो । यसअघि, हामुरा सहरमा एक अमेरिकी सैनिक बेस बाहिर अवतरण गरेपछि सुरक्षाको कारण देखाउँदै प्रशिक्षण अस्थायी रूपमा स्थगित गरिएको थियो । स्थगन फुकुवा भई अभ्यास सुरु गरेकै दिन पुनः अर्को दुर्घटना भएकोले स्थानीयमा त्रास र आक्रोश बढेको छ ।
