टोकियो – जापानको गुन्मा प्रिफेक्चरस्थित हाइकिङ र प्राकृतिक दृश्यका लागि प्रख्यात ‘माउन्ट म्योगी’ मा सोमबार बिहानैदेखि भीषण वन डढेलो फैलिएको छ । आगो नियन्त्रण बाहिर जान थालेपछि स्थानीय सरकारले सहयोगका लागि ‘सेल्फ डिफेन्स फोर्स’ (जापानी सेना) लाई गुहारेको छ ।
टोकियोबाट उत्तरपश्चिममा अवस्थित र तोमिओका नगरसँग जोडिएको यस हिमालमा सोमबार बिहान ९ बजेभन्दा केही समयअघि आगलागी सुरु भएको जानकारी प्राप्त भएको थियो । अधिकारीहरूका अनुसार दिउँसोसम्म आइपुग्दा आगोले करिब ८ हेक्टर वन क्षेत्र सखाप पारिसकेको छ ।
स्थानीय प्रशासनले हेलिकप्टरको प्रयोग गरी हवाई मार्गबाट आगो नियन्त्रणको प्रयास जारी राखे पनि डढेलो फैलिने क्रम रोकिएको छैन । स्थितिको गम्भीरतालाई मध्यनजर गर्दै गुन्मा प्रिफेक्चर सरकारले थप सहयोगका लागि सेना परिचालन गर्न औपचारिक अनुरोध गरेको छ ।
हालसम्म आगलागीबाट कुनै पनि आवासीय घरमा क्षति पुगेको वा मानवीय हताहती भएको खबर प्राप्त भएको छैन । यद्यपि, आगलागी क्षेत्र वरपर उच्च सतर्कता अपनाइएको अधिकारीहरूले बताएका छन् ।
