टोकियो – जापान सरकारले बुधबार चीनको गतिविधिमाथि आफूले विशेष ध्यान दिइरहेको बताएको छ । बेइजिङमा दोस्रो विश्वयुद्धमा जापानको औपचारिक आत्मसमर्पणको ८० औं वार्षिकोत्सवको अवसरमा आयोजित विशाल सैन्य परेडलाई जापानले ‘गहिरो चासो’का साथ नियालिरहेको हो ।
उक्त परेडमा रुसी राष्ट्रपति भ्लादिमिर पुटिन र उत्तर कोरियाली नेता किम जोङ उनलगायतका उच्च पदस्थ पाहुनाहरू उपस्थित थिए । जापानका प्रमुख सरकारी प्रवक्ता योशिमासा हायाशीले चीनको मनसायबारे टिप्पणी गर्न अस्वीकार गरे पनि नियमित पत्रकार सम्मेलनमा भने, ‘हामी सम्बन्धित गतिविधिहरूलाई गहिरो चासोका साथ नजिकबाट हेरिरहेका छौं ।’
उनले जापानले चीनलाई ‘शान्तिप्रेमी राष्ट्र’ को रूपमा आफ्नो अडान पटकपटक स्पष्ट पारेको र युद्धको त्रासदी दोहोरिन नदिने प्रतिबद्धता व्यक्त गरेको पनि बताए । जापानले दोस्रो विश्वयुद्धअघि चीनको ठूलो भूभागमाथि आक्रमण गरेको थियो भने सन् १९१० देखि १९४५ सम्म कोरियाली प्रायद्वीपलाई उपनिवेश बनाएको थियो ।
प्रमुख क्याबिनेट सचिव हायाशीले जापान र चीनबीच ‘साझा रणनीतिक हितमा आधारित पारस्परिक लाभदायक सम्बन्ध’ लाई व्यापक रूपमा प्रवर्द्धन गर्ने र ‘रचनात्मक तथा स्थिर’ द्विपक्षीय सम्बन्ध निर्माण गर्ने बृहत् दिशामा समान धारणा रहेको पनि बताए ।
चीनले जापानविरुद्धको प्रतिरोध युद्धमा आफ्नो विजयको ८० औं वार्षिकोत्सव मनाउन आयोजित सैन्य परेडमा आफ्नो नयाँ पुस्ताका हतियारहरू प्रदर्शन गरेको थियो । साथै, रुस र उत्तर कोरियाका नेताहरूको उपस्थितिमार्फत यी दुई राष्ट्रसँगको आफ्नो एकतालाई पनि हाइलाइट गरेको थियो ।
