टोकियो – अमेरिकी राष्ट्रपति डोनाल्ड ट्रम्पले जापानलगायत विश्वका अधिकांश व्यापारिक साझेदारहरूमाथि भारी भन्सार शुल्क लगाउने एक कार्यकारी आदेशमा हस्ताक्षर गरेका छन् । यो निर्णय अगस्ट ७ देखि लागू हुनेछ, जसले विश्वव्यापी व्यापार प्रणालीलाई प्रभावित पार्ने निश्चित छ ।
आदेशअनुसार, जापानबाट आयात हुने सामानमा १५ प्रतिशतको नयाँ भन्सार दर तोकिएको छ । अन्य देशहरूमाथि पनि १० देखि ४१ प्रतिशतसम्मको शुल्क लाग्नेछ, जसमा भारतमाथि २५ प्रतिशत र ताइवानमाथि २० प्रतिशत शुल्क समावेश छ ।
ट्रम्पले अमेरिकी उत्पादन क्षेत्रलाई पुनर्जीवित गर्न यो कडा कदम चालेको बताएका छन् । हालै जापानले अमेरिकामा ठूलो लगानी गर्ने प्रतिबद्धता जनाएपछि उसको भन्सार दर २५ प्रतिशतबाट घटाएर १५ प्रतिशतमा झारिएको थियो । यसैबीच, ट्रम्प प्रशासनले क्यानडामाथिको शुल्क बढाएर ३५ प्रतिशत पुर्याएको छ भने मेक्सिको र चीनसँग छुट्टै व्यापार वार्ता जारी राखेको छ ।
