काठमाडौं- सरकारले राष्ट्र विकासमा नागरिक सहयोग जुटाउन राष्ट्रिय स्वयंसेवा अभियान घोषणा गरेको छ । प्रधानमन्त्री कार्यालय सिंहदरबारमा शनिबार कार्यक्रम गरी सरकारले यसलाई बाहिर ल्याएको हो ।अभियानमा विश्वविद्यालय तथा उच्च माविका विद्यार्थी, राजनीतिक दल र तिनका भ्रातृ संगठनहरू, कर्मचारी, उद्यम व्यवसायी, सञ्चारकर्मी, कलाकार, समाजसेवी, गैरसरकारी संघसंस्था र गैरआवासीय नेपालीलाई सहभागी गराइनेछ । अभियानअन्तर्गत नदी सफाइ, सहर, बस्ती सरसफाइ, एक घर एक शौचालय, खानेपानी निर्माण तथा वितरण, मठमन्दिर, कला संस्कृतिको पुनर्निर्माण तथा जीर्णाद्धार, स्वास्थ्य, कृषि, पशुपालन वा व्यावसायिक खेतीसम्बन्धी कामलगायत छन् ।
‘निःशुल्क सहयोगलाई सत्कर्मका रूपमा लिएर’ नेपालीहरूकै स्रोत, साधन वा सीप प्रयोग गरी नागरिकलाई सर्वांगीण विकासमा सहभागी गराउनु यसको मूल उद्देश्य रहेको प्रधानमन्त्री कार्यालयका सचिव लीलामणि पौडेलले बताए । कार्यक्रममा मह सञ्चारका मदनकृष्ण श्रेष्ठले सामाजिक काममा राजनीति नघुसाउन आग्रह गरे ।
कार्यक्रममा प्रधानमन्त्री भट्टराईले अभियान सफल पार्न सबैलाई आग्रह गरे । ‘शान्ति र संविधानपछि हामी समृद्धिमै जाने हो,’ उनले भने, ‘त्यसकारण यो अभियान सुरु गरेका हौं ।’ उनले आफैं वाग्मती र विष्णुमती सफा गर्न जाने बताए ।
