टोकियो – जापानको सुदूर दक्षिणमा रहेको टापु ओकिनोत्तोरीसिमा नजिकैको विशेष आर्थिक क्षेत्रभित्र चिनियाँ नौसेनाको युद्धपोतले मेसिन गनबाट गोलाबारी अभ्यास गरेको जापानी रक्षा मन्त्रालयले पुष्टि गरेको छ । रुसी युद्धपोतको समेत उपस्थिति रहेको यस सैन्य गतिविधिलाई जापानले निकै गम्भीरताका साथ लिएको छ ।
मन्त्रालयका अनुसार, गत आइतबार प्रशान्त महासागरस्थित ओकिनोत्तोरीसिमा टापुबाट करिब ३३० किलोमिटर दक्षिण-पश्चिममा चीनका दुईवटा ‘मिसाइल डिस्ट्रोयर’ र एउटा आपूर्ति जहाजका साथै रुसी नौसेनाको एक ‘फ्रिगेट’ देखिएका थिए । जापानी समुद्री आत्मरक्षा बलले ती चारवटा जहाज उत्तर-पूर्वतर्फ अघि बढिरहेको फेला पारेको थियो ।
निगरानीका क्रममा, ती चार जहाजमध्ये चीनको एउटा मिसाइल डिस्ट्रोयरले टापुबाट १८० किलोमिटर दक्षिण-पश्चिममा रहेको जापानी ‘विशेष आर्थिक क्षेत्र’ भित्र प्रवेश गरी मेसिन गनबाट गोलाबारीको अभ्यास गरेको पुष्टि भएको हो ।
अभ्यास सुरु गर्नुअघि चिनियाँ टोलीले वरपरका जलक्षेत्रमा रहेका अन्य जहाजहरूलाई स्थान र समयका बारेमा पूर्व जानकारी (सूचना) जारी गरेको थियो । अभ्यासको समयमा रुसी युद्धपोत पनि सोही क्षेत्रको नजिकै रहेको जापानी अधिकारीहरूले बताएका छन् ।
जापानी रक्षा मन्त्रालयले यस प्रकारका सैन्य अभ्यासहरूले उक्त जलक्षेत्रमा सञ्चालन भइरहेका व्यापारिक तथा अन्य जहाजहरूको सुरक्षामा गम्भीर जोखिम निम्त्याउन सक्ने भन्दै चिन्ता व्यक्त गरेको छ । ‘आफ्नो विशेष आर्थिक क्षेत्रभित्र हुने यस्ता अप्रत्याशित गतिविधिले क्षेत्रीय सुरक्षामा चुनौती थपेको छ,’ मन्त्रालयका एक अधिकारीले भने ।
जापानले कूटनीतिक माध्यममार्फत चीन सरकारसँग यस विषयमा सम्पर्क गरी आफ्नो धारणा स्पष्ट पारेको छ । साथै, उक्त संवेदनशील क्षेत्रमा जापानी सेनाले आफ्नो निगरानी र गुप्तचरी गतिविधिलाई थप तीव्र बनाएको छ । पछिल्लो समय एसिया-प्रशान्त क्षेत्रमा चीन र रुसको बढ्दो सैन्य समन्वयले जापान र यसका सहयोगी राष्ट्रहरूमा सामरिक चिन्ता बढाएको छ ।
