समाचार सुन्नुहोस :
काठमाडौँ – उत्तरी जापान मा बुधबार हिउँले पुरिएका तीन जनालाई उद्धार गरिएको छ। तीमध्ये एक जना अचेत अवस्थामा फेला परेको स्थानीय सञ्चारमाध्यमले जनाएका छन्।
होक्काइडो प्रान्तको राजधानी साप्पोरो मा रहेको एक भवनको छतबाट ठूलो मात्रामा हिउँ खसेपछि उनीहरू पुरिएका थिए। नजिकैका एक बासिन्दाले आपतकालीन सेवामा खबर गरेपछि उद्धार टोली घटनास्थल पुगेको थियो। स्थानीय अग्निशमन विभागलाई उद्धृत गर्दै क्योडो न्यूज ले तीनै जनालाई सुरक्षित रूपमा बाहिर निकालिएको जनाएको छ।
उद्धार गरिएका मध्ये अचेत अवस्थामा भेटिएका एक जनालाई तुरुन्तै अस्पताल लगिएको अग्नि नियन्त्रण निकायले पुष्टि गरेको छ। घटनाका बेला प्रभावित क्षेत्रमा तापक्रम २.९ डिग्री सेल्सियस रहेको मौसम विभागले जनाएको छ, जुन मार्चको सुरुआती समयको औसत जस्तै हो।
हिउँले पुरिएको भवन एक निजी कम्पनीको गोदाम भएको बताइएको छ। घटनाको कारणबारे स्थानीय अधिकारीहरूले थप अनुसन्धान गरिरहेका छन्।
