टोकियो – जापानको सत्तारुढ लिबरल डेमोक्रेटिक पार्टी (एलडिपी) ले आइतबार सम्पन्न प्रतिनिधि सभा (तल्लो सदन) को निर्वाचनमा दुई-तिहाइ बहुमतसहित सानदार जित हासिल गरेको छ । यो ऐतिहासिक विजयसँगै प्रधानमन्त्री सानाए ताकाइचीलाई आफ्नो अनुदारवादी (कन्जरभेटिभ) नीतिहरू दृढताका साथ अगाडि बढाउन ठूलो राजनीतिक शक्ति प्राप्त भएको हो ।
४६५ सदस्यीय तल्लो सदनमा एलडिपीले ३१० सिटको ‘जादुई आँकडा’ पार गर्दै दुई-तिहाइ बहुमत सुनिश्चित गरेको छ । दोस्रो विश्वयुद्धपछिको जापानको इतिहासमा एकल पार्टीले यस्तो उपलब्धि हासिल गरेको यो पहिलो पटक हो । यो बहुमतसँगै अब प्रधानमन्त्री ताकाइचीलाई जापानको संविधान संशोधन गर्ने प्रक्रिया अगाडि बढाउन र माथिल्लो सदन (हाउस अफ काउन्सिलर्स) ले अस्वीकृत गरेका विधेयकहरूलाई समेत पुनः पारित गराउन बाटो खुला भएको छ ।
यसअघि तल्लो सदनमा एलडिपीको १९८ सिट मात्रै थियो । गत अक्टोबरमा पदभार सम्हालेकी ताकाइचीको व्यक्तिगत लोकप्रियताका कारण पार्टीले उल्लेख्य सिट संख्या थप्न सफल भएको विश्लेषण गरिएको छ । एलडिपी र उसको गठबन्धन साझेदार ‘जापान इनोभेसन पार्टी’ (जेआईपी) को सदनमा अब भारी उपस्थिति रहनेछ ।
विपक्षी गठबन्धनको लज्जास्पद हार
निर्वाचनको परिणामले भर्खरै गठन भएको मुख्य विपक्षी दल ‘सेन्ट्रिस्ट रिफर्म एलायन्स’ लाई ठूलो धक्का दिएको छ । निर्वाचनअघि १६७ सिट रहेको यस गठबन्धनले यसपटक आधा सिट पनि जोगाउन सकेन । हारको जिम्मेवारी लिँदै गठबन्धनका सह-नेताहरू योशिहिको नोडा र तेत्सुओ साइतोले राजीनामा दिने संकेत गरेका छन् । कन्स्टिच्युसनल डेमोक्रेटिक पार्टी र कोमेइतो पार्टी मिलेर बनेको यो गठबन्धनलाई मतदाताले चुनावी फाइदाका लागि गरिएको अप्राकृतिक मिलनका रूपमा बुझ्दा पराजय भोग्नुपरेको टिप्पणी गरिएको छ ।
आक्रामक आर्थिक र रक्षा नीति
विजयपछि सञ्चारमाध्यमहरूसँग बोल्दै प्रधानमन्त्री ताकाइचीले भनिन्, ‘हामीले गरेका चुनावी वाचाहरू पूरा गर्ने ठूलो जिम्मेवारी अब हाम्रो काँधमा आएको छ ।’ उनले बढ्दो मुद्रास्फीति र जटिल अन्तर्राष्ट्रिय सुरक्षा वातावरणलाई मध्यनजर गर्दै ‘जिम्मेवार तर आक्रामक’ वित्तीय नीति लिने र देशको रक्षा क्षमतालाई सुदृढ बनाउने प्रतिबद्धता दोहोर्याइन् ।
विशेष गरी, दैनिक उपभोग्य वस्तुको बढ्दो मूल्यबाट राहत दिन ताकाइचीले खाद्यान्नमा लाग्ने ८ प्रतिशत ‘कन्जम्पसन ट्याक्स’ (उपभोक्ता कर) लाई दुई वर्षका लागि निलम्बन गर्ने आफ्नो योजनालाई तीव्रता दिने घोषणा गरेकी छन् ।
पपुलिस्ट समूहका रूपमा चिनिएको ‘सानसेइतो’ पार्टीले यसपटक १३ सिट जित्दै आफ्नो उपस्थिति बलियो बनाएको छ भने प्रविधिमैत्री राजनीतिको वकालत गर्ने ‘टिम मिराई’ ले ९ सिटसहित पहिलो पटक तल्लो सदनमा प्रवेश पाएको छ ।
भारी हिमपात र चिसोका बावजुद मतदाताको उपस्थिति उत्साहजनक रह्यो। यसपटक ५६.२३ प्रतिशत मतदान भएको छ, जुन सन् २०२४ को निर्वाचनको तुलनामा २ प्रतिशतले बढी हो । झन्डै २ करोड ७० लाख मानिसले ‘अर्ली भोटिङ’ (अग्रिम मतदान) मार्फत आफ्नो मताधिकार प्रयोग गरेका थिए, जुन आफैँमा एक कीर्तिमान हो ।
३६ वर्षपछि पहिलो पटक फेब्रुअरीको हिउँदमा चुनाव गराएको भन्दै ताकाइचीको आलोचना भए पनि नतिजाले उनलाई अनुमोदन गरेको छ । यद्यपि, चुनावी व्यस्तताका कारण सन् २०२६ को वार्षिक बजेट पारित गर्न हुने ढिलाइ र विपक्षीहरूको विरोधलाई चिर्नु उनका लागि आगामी चुनौती हुनेछन् ।
वर्तमान मन्त्रिपरिषद्लाई खासै फेरबदल नगर्ने संकेत गरेकी ताकाइचीले गठबन्धन साझेदार जेआईपीलाई पनि सरकारमा सहभागी गराएर सन्तुलित ढंगले अघि बढ्ने लक्ष्य राखेकी छन् । यो जितले जापानको राजनीतिमा लामो समयपछि एउटा स्थिर र शक्तिशाली नेतृत्वको उदय भएको संकेत गरेको छ ।
