टोकियो – टोकियो महानगर सरकारले जापानमा प्रतिबन्धित ‘इटोमिडेट’ नामक लागुऔषध अनलाइनमार्फत खुलेआम बिक्री भइरहेको तथ्य फेला पारेको छ । यो गम्भीर विषय सार्वजनिक भएसँगै सरकारले सर्वसाधारणलाई उक्त उत्पादन खरिद नगर्न कडा आग्रह गरेको छ ।
‘इटोमिडेट’ एक प्रकारको एनेस्थेटिक (बेहोस बनाउने) रसायन हो, जसले प्रयोगकर्तामा भ्रम सिर्जना गर्छ । यसको अत्यधिक सेवनले शरीरमा कम्पन हुने वा ऐंठन आउने जस्ता गम्भीर स्वास्थ्य समस्या निम्त्याउन सक्छ । जापानमा विशेषगरी दक्षिणी प्रान्त ओकिनावाका युवाहरूमा यसको दुरुपयोग बढेको पाइएको छ । यसको जोखिमलाई मध्यनजर गर्दै गत मे महिनामा जापानको केन्द्रीय सरकारले यसलाई ‘तोकिएको लागुऔषध’ को सूचीमा राख्दै यसको प्रयोग र साथमा राख्न प्रतिबन्ध लगाएको थियो ।
क्यानाबिस (गाँजा) जस्तै प्रभाव पार्ने अन्य लागुऔषधहरू अनलाइनमा वितरण भइरहेको छ कि छैन भनी अनुसन्धान गर्ने क्रममा टोकियोका सरकारी अधिकारीहरूले यो पदार्थ फेला पारेका हुन् । अधिकारीहरूले शंकास्पद उत्पादनहरू प्राप्त गरी प्रयोगशालामा परीक्षण गर्दा त्यसमा इटोमिडेट रहेको पुष्टि भएको थियो । टोकियोमा गरिएको निरीक्षणका क्रममा यो पदार्थ पहिचान भएको यो पहिलो पटक हो ।
अनुसन्धानका अनुसार, यो लागुऔषध ई-सिगरेट (विद्युतीय चुरोट) जस्तै देखिने भाँडोमा राखेर हुलाकमार्फत पठाइएको पाइएको छ । अधिकारीहरूले बताएअनुसार निगरानीबाट बच्नका लागि तस्करहरूले उत्पादनको नाम लेख्न अक्षरको सट्टा ‘इमोजी’को प्रयोग गरेका थिए ।
टोकियो सरकारका अधिकारीहरूले इमोजी वा साङ्केतिक अक्षरहरू प्रयोग गरिएका यस्ता उत्पादनहरू हानिकारक लागुऔषध हुन सक्ने भन्दै सचेत गराएका छन् । सरकारले यस्ता शंकास्पद वस्तुहरू खरिद वा प्रयोग नगर्न आम नागरिकमा विशेष अपिल गरेको छ ।
