टोकियो – जापानको शिगा प्रिफेक्चरस्थित हिनो शहरमा एक ७१ वर्षीय वृद्धलाई हत्या प्रयासको आरोपमा प्रहरीले पक्राउ गरेको छ । ती व्यक्तिमाथि आफ्नो अपार्टमेन्टको बाल्कोनीबाट तल रहेका दुई जनामाथि ठूलो ढुङ्गा फालेको अभियोग लगाइएको छ ।
प्रहरीका अनुसार, शोजी किकुची नामक ती वृद्धले जुलाई ५ को बिहान करिब ६:१५ बजे आफ्नो चौथो तल्लाको अपार्टमेन्टको बाल्कोनीबाट ढुङ्गा फालेका थिए । प्रहरीले जनाएअनुसार, उनको निशानामा तल आफ्नो कार मर्मत गरिरहेका एक २४ वर्षीया महिला र ३३ वर्षीय पुरुष थिए । ढुङ्गाले ती दुई जनालाई नलागे पनि महिलाको कारमाथि बजारिएको थियो, जसका कारण कारको पछाडिको सिसा फुटेको छ ।
यसअघि किकुचीलाई जुलाई ९ मा अर्को एक घटनामा पक्राउ गरिएको थियो । उनले आफ्नो अपार्टमेन्ट भवनमा बस्ने एक महिलाको मोटरसाइकलको लाइसेन्स प्लेट बंग्याइदिएका थिए । प्रहरीसँगको बयानमा उनले ‘मोटरसाइकल पार्क गरेको तरिका मन नपरेकाले’ त्यसो गरेको बताएका थिए ।
सोही सोधपुछका क्रममा उनले जुलाई ५ मा ढुङ्गा फालेको घटना पनि स्वीकार गरेका छन्, तर उनले कसैको हत्या गर्ने मनसाय भने नभएको दाबी गरेका छन् । उनले प्रहरीलाई भने, ‘म बाल्कोनीमा गमला यताउता सार्दै थिएँ, त्यही क्रममा झुक्किएर ढुङ्गा वा माटोको डल्लो तल खस्यो, तर मेरो मनसाय कसैको हत्या गर्ने वा कारलाई क्षति पुर्याउने थिएन ।’
