काठमाडौं – युक्रेनका राष्ट्रपति भोलोदिमिर जेलेन्स्की जर्मनीपछि फ्रान्स पुगेका छन् । आइतबारदेखि उनी युरोपको अर्को विशाल अर्थतन्त्र फ्रान्समा पुगेका हुन् । उनले पेरिसमा फ्रान्सका राष्ट्रपति इमानुएल म्याक्रोंसँग भेटवार्ता हुने अपेक्षा गरिएको छ ।
जेलेन्स्कीको सप्ताहन्तको कूटनीतिक भ्रमण रेक्जाभिकमा इयूको शिखर सम्मेलन र जापानमा जी-७ नेताहरूको जमघटको पूर्व सन्ध्यामा हुन लागेको हो । जेलेन्स्कीले रूसविरुद्धको आफ्नो देशको लडाइँमा जर्मनीलाई ‘सच्चा मित्र’ को संज्ञा दिएका थिए । राष्ट्रपति जेलेन्स्कीको भ्रमणका क्रममा बर्लिनले कीएभका लागि २.७ अर्ब युरो (तीन अर्ब अमेरिकी डलर) बराबरको नयाँ सैन्य प्याकेज सार्वजनिक गरेको छ, जुन युक्रेनका लागि अहिलेसम्मकै सबैभन्दा ठूलो हो ।
युक्रेनका राष्ट्रपति जेलेन्स्कीले पछिल्लो एक हप्तामा जर्मन चान्सलर ओलाफ स्कोल्ज, जर्मन समकक्षी फ्रान्क वाल्टर स्टेनमियरका साथै रोममा इटालियन नेता र पोप फ्रान्सिससँग भेटवार्ता गरेका थिए । बर्लिनमा उनले चान्सलर ओलाफ स्कोल्जलाई हतियार प्याकेजको रूपमा जर्मनीको ‘शक्तिशाली समर्थन’ का लागि धन्यवाद दिँदै भने, ‘यो सुरक्षा प्याकेजमा भएका सबै कुराले हाम्रो प्रतिरक्षालाई उल्लेखनीय रूपमा बलियो बनाउनेछ ।’
