टोकियो – जापानको फुकुशिमा सहरमा गत मे १९ तारिखमा म्यानहोलभित्र काम गर्ने क्रममा बेहोस भएका दुई कामदारमध्ये उपचाररत दोस्रो व्यक्तिको पनि मृत्यु भएको छ । अस्पतालमा जीवन र मृत्युको सङ्घर्ष गरिरहेका ७० वर्षीय वृद्ध कामदारको जुन २ तारिखमा निधन भएसँगै यस दुर्घटनामा ज्यान गुमाउनेको संख्या दुई पुगेको छ ।
फुकुशिमा सहरको ओकिताका क्षेत्रमा करिब ४ मिटर गहिरो म्यानहोलभित्र मर्मत वा सरसफाइका लागि पसेका दुई कामदारहरू अचानक बेहोस भई ढलेका थिए । दुर्घटनामा ३१ वर्षीय युवकको सोही समयमा मृत्यु भएको थियो भने ७० वर्षीय पुरुषलाई अचेत अवस्थामा उद्धार गरी अस्पताल पुर्याइएको थियो । चिकित्सकहरूका अनुसार दुवैको मृत्युको मुख्य कारण ‘हाइपोक्सिक इन्सेफ्यालोप्याथी’ (मस्तिष्कमा अक्सिजनको कमी) रहेको पाइएको छ ।
अनुसन्धानका क्रममा कामदारहरूको सुरक्षामा ठूलो लापरवाही भएको तथ्यहरू बाहिर आएका छन् । उनीहरू कार्यरत कम्पनीका अनुसार ज्वलनशील ग्यास मापन गर्ने ठूलो उपकरण कम्पनीको कार्यालयबाट बाहिर निकालिएकै थिएन । त्यस्तै, म्यानहोलभित्र अक्सिजनको मात्रा र विषाक्त ‘हाइड्रोजन सल्फाइड’ ग्यासको अवस्था जाँच्न प्रयोग गरिने दुईवटा साना पोर्टेबल उपकरणहरू पनि म्यानहोलभित्र भेटिएनन् । ती जीवनरक्षक उपकरणहरू कामदारले प्रयोग नगरी बाहिर गाडीमै छाडेको प्रहरी अनुसन्धानबाट खुलेको छ ।
मेयरद्वारा माफी याचना
कामको जिम्मा दिने फुकुशिमा नगरपालिकाका मेयर बाबाले यस घटनाप्रति गहिरो दुःख व्यक्त गरेका छन् । उनले एक विज्ञप्ति जारी गर्दै भनेका छन्, ‘दुईजना व्यक्तिको अमूल्य जीवन गुमेको यस गम्भीर दुर्घटनाले नागरिकहरूमा चिन्ता पैदा गरेको छ, म यसका लागि क्षमायाचना गर्दछु । हामी सम्बन्धित निकायहरूसँग मिलेर घटनाको सूक्ष्म अनुसन्धान गर्नेछौँ र भविष्यमा यस्ता दुर्घटना दोहोरिन नदिन कडा सुरक्षा उपायहरू लागू गर्नेछौँ ।’
