टोकियो – जापानको प्रख्यात पर्यटकीय गन्तव्य ओकिनावाको प्रिफेक्चरल सभाले बिहीबार स्थानीय पर्यटनलाई सघाउन २ प्रतिशत आवास कर लगाउने अध्यादेश पारित गरेको छ ।
सन् २०२६ को आर्थिक वर्षबाट लागू हुने यो कर प्रिफेक्चरल स्तरमा यस प्रकारको पहिलो कर हुनेछ । आगामी अप्रिलबाट नयाँ आर्थिक वर्ष सुरु हुनेछ । यो निर्णय जुलाइमा ‘जंग्लिया ओकिनावा’ थिम पार्क खुलेपछि आएको हो, जसले गर्दा ओकिनावामा स्वदेशी तथा विदेशी पर्यटकको संख्या बढेको छ । यसले स्थानीय पर्यटन व्यवसायीहरूमाझ नयाँ आशा जगाएको छ ।
होटेल तथा सरायमा बस्ने पर्यटकका लागि प्रति रात अधिकतम २,००० येन (१४ अमेरिकी डलर) कर लाग्नेछ । विद्यालय भ्रमण र अतिरिक्त क्रियाकलापमा सहभागी हुनेहरूलाई भने यो करबाट छुट दिइनेछ । यो करबाट वार्षिक करिब ७.८ बिलियन येन आम्दानी हुने अनुमान गरिएको छ । यो रकम रमणीय प्राकृतिक भूभागको संरक्षण, पर्यटन क्षेत्रमा काम गर्ने जनशक्तिको व्यवस्थापन र ओकिनावाको प्रमुख आकर्षण समुद्री मनोरञ्जनका लागि सुरक्षा उपायहरू बढाउन प्रयोग गरिनेछ ।
प्रिफेक्चरल सरकार र स्थानीय नगरपालिकाहरूले यो आम्दानीलाई समान रूपमा बाँडफाँड गर्नेछन्, तर पाँचवटा नगरपालिकाले भने आफ्नै आवास कर लगाउने योजना बनाएका छन् ।
