टोकियो – मध्य जापानको एक स्टेसनमा बुलेट ट्रेनको डिब्बा मुनिको उपकरणमा आगलागी भएपछि हजारौं यात्रुहरूको यात्रा प्रभावित भएको छ । जेआर सेन्ट्रलले शनिबार दिएको जानकारी अनुसार उक्त घटना शुक्रबार राति भएको हो ।
रेल सञ्चालकका अनुसार, ओसाकाबाट सिजुओकाका लागि छुटेको तोकाइदो सिन्कानसेन लाइनको रेल सिगा र गिफु प्रिफेक्चरको बीचमा गुडिरहेको बेला एक कन्डक्टरले एउटा डिब्बामा केही जलेको गन्ध आएको महसुस गरेका थिए । जब रेल गिफु-हाशिमा स्टेसनमा आइपुग्यो, डिब्बामा धुवाँ देखिएपछि करिब २५० जना यात्रुहरूलाई सुरक्षित रूपमा बाहिर निकालिएको थियो । जाँचका क्रममा आगो लागेको पत्ता लागेपछि करिब दुई घन्टापछि निभाइएको थियो ।
जेआर सेन्ट्रलले शनिबार बताएअनुसार, १६ डिब्बाको रेलको नवौं डिब्बाको भुइँमुनि रहेको मोटरको गति नियन्त्रण गर्ने ‘कन्भर्टर’बाट धुवाँ निस्किएको थियो । यो N700S मोडलको रेल थियो जसलाई गत जुन महिनामा मात्रै सेवामा ल्याइएको थियो । यस घटनाका कारण अन्य रेल सेवाहरूमा ५२ मिनेटसम्म ढिलाइ भएको थियो, जसबाट ३,८०० जना यात्रु प्रभावित भएका थिए ।
