समाचार सुन्नुहोस :
काठमाडौँ – पूर्व अमेरिकी उपराष्ट्रपति कमला ह्यारिसले राजनीति छोड्ने निर्णय गरेकी छिन्। उनले अमेरिकी टेलिभिजन कार्यक्रम ‘द लेट शो विथ स्टीफन कोल्बर्ट’ मा अन्तर्वार्ता दिँदै अब कुनै पनि राजनीतिक पदको लागि उम्मेदवार नबन्ने बताइन्। ह्यारिसका अनुसार अमेरिकाको राजनीतिक प्रणाली ‘भाँचिएको’ छ र लोकतान्त्रिक मूल्य बचाउन आफूमा अब पर्याप्त शक्ति छैन। क्यालिफोर्नियाकी पूर्व गभर्नर समेत रहेकी उनले आफ्नो करियरभर जनताको सेवा गरे पनि अब प्रणाली परिवर्तन गर्ने क्षमता घटेको महसुस भएको जनाइन्।
कार्यक्रमका होस्टले सक्षम व्यक्तिले यस्तो भन्नु चिन्ताजनक भएको उल्लेख गर्दा ह्यारिसले अब देशभर यात्रा गरेर मानिसहरूको कुरा सुन्ने इच्छा व्यक्त गरिन्, तर भोट माग्ने उद्देश्य भने नभएको बताइन्। उनको नयाँ पुस्तक ‘१०७ डेज’ आगामी सेप्टेम्बर २३ मा प्रकाशित हुँदैछ, जसमा उनले राष्ट्रपति चुनावको १०७ दिन लामो अभियानका अनुभवहरू समेटेकी छिन्।
२०२४ को अमेरिकी राष्ट्रपति चुनावमा ह्यारिस डोनाल्ड ट्रम्पसँग पराजित भएकी थिइन्। ट्रम्पले ३१२ इलेक्टोरल मत पाउँदा ह्यारिसले २२६ मत प्राप्त गरेकी थिइन्।
