टोकियो – नयाँ कृषि मन्त्री सिन्जिरो कोइजुमीले सरकारले चामलको मूल्य घटाउने योजना बनाएको बताएका छन् । उनले शुक्रबार राति एक टेलिभिजन कार्यक्रममा सरकारले आफ्नो सञ्चित चामल खुद्रा बिक्रेताहरूलाई प्रत्यक्ष सम्झौतामार्फत बिक्री गर्ने योजना बनाएको बताएका हुन् । यसको लक्ष्य पसलहरूमा प्रति ५ किलोग्राम २ हजार येन ($१४) मा चामल उपलब्ध गराउनु हो ।
यो सञ्चित चामल आगामी जुन महिनादेखि नै पसलहरूमा पुग्ने अपेक्षा गरिएको छ । सरकारले चामलको मूल्यवृद्धि नियन्त्रण गर्न नसकेको र मुद्रास्फीतिले ज्याला वृद्धिलाई उछिनेका कारण घरपरिवार मारमा परेको भन्दै आलोचना बढेपछि यो कदम चालिएको हो ।
आफ्ना पूर्ववर्तीले समर्थकहरूबाट चामल उपहार लिएको विषयमा टिप्पणी गरेपछि राजीनामा दिएसँगै बुधबार पदभार ग्रहण गरेका कोइजुमीले सञ्चित अन्नलाई लिलामी प्रक्रियालाई बाइपास गर्दै सिधै खुद्रा बिक्रेताहरूलाई बिक्री गर्ने प्रतिबद्धता जनाएका छन् । लिलामी प्रक्रियाले मूल्यमा सरकारी नियन्त्रणलाई रोकेको थियो ।
प्रधानमन्त्री सिगेरु इशिबाको सरकारले सोमबारदेखि नै सम्झौता वार्ताका लागि प्रक्रिया सुरु गर्ने सम्भावना छ, साथै देशभर व्यापक वितरण सुनिश्चित गर्न सस्तो मूल्यको सञ्चित चामलको अनलाइन बिक्रीको पनि खोजी गरिरहेको छ ।
जापानी सुपरमार्केटहरूमा देशको मुख्य खाद्यपदार्थ चामलको औसत मूल्य मे महिनाको सुरुमा प्रति ५ किलोग्राम ४ हजार २ सय ६८ येन पुगेको थियो, जुन गत वर्षको तुलनामा करिब दोब्बर हो । कमसल बाली र बढ्दो पर्यटकीय आगमनका कारण चामलबाट बन्ने परिकारको माग बढ्दा यस्तो भएको हो ।
शुक्रबार सार्वजनिक सरकारी तथ्याङ्कअनुसार, अप्रिल महिनामा चामलको मूल्य लगातार सातौं महिना कीर्तिमानी स्तरमा पुगेको छ, जुन एक वर्षअघिको तुलनामा ९८ दशमलव ४ प्रतिशतले बढी हो । सोही महिनामा अस्थिर ताजा खाद्यवस्तुबाहेकको मुख्य उपभोक्ता मूल्य ३ दशमलव ५ प्रतिशतले बढेको थियो । सरकारले सुरुमा ३ लाख टन चामल जारी गर्ने योजना बनाएको छ र आवश्यक परे थप आपूर्ति गर्न सक्नेछ ।
