प्रिय घरबेटी बा,
कोरोना भाइरसको महामारीले विश्वमा मानव जीवन नै संकटमा परेका बेला मानवीय अस्तित्व जोगाउनका लागि एकले अर्कोलाई सहयोग गर्नु अपरिहार्य छ । सन् २०१९ को डिसेम्बर अन्तिम साता तिर चीनको वुहान शहरबाट सुरु भएको यो भाइरस विश्वका २१५ देशमा फैलिसकेको छ । हालसम्मको अवस्थालाई नियाल्दा, यो भाइरसबाट हाम्रो देश नेपालमा पनि ठूलो महामारी आउने निश्चित जस्तै भएको छ । दिन प्रतिदिन कोरोना संक्रमित बढिरहेका छन् । काठमाडौँ जस्तो घना बस्ति भएको शहरमा समयमै ध्यान पुर्याउन नसके ठूलो महामारी निम्तिन्छ । देशका विभिन्न जिल्लाबाट आफ्नो भविष्य बनाउन भनेर काठमाडौँ छिरेका थुप्रैका सपना कोरोना भाइरसले चकनाचुर बनाएको छ ।
कतिपयले खाना पाएका छैनन् त्यसैमाथि घरबेटी बा तपाइले स्वास्थ्य क्षेत्रका मानिसहरुलाई घर प्रवेश गर्न नै रोक लगाउनु भयो रे । कोरोना भाइरसले निम्त्याएको यो महामारीलाई नियन्त्रण गर्न अग्रपंक्तिमा खटिएका स्वास्थ्यकर्मीहरुलाई यस्तो गर्नु कतिको उचित होला ? घरबेटी बा, यदि कुनै कारणबस तपाइ पनि संक्रमित हुनुभयो भने यिनै स्वास्थ्यकर्मीले तपाइको ज्यान बचाउँछने हैनन र ?
काठमाडौँमा बस्ने थुप्रै विद्यार्थीहरु र दैनिक मजदुरी गरेर खाने वर्ग तथा निजी क्षेत्रमा काम गर्नेहरु नै यो लकडाउनले प्रभावित बनेका छन् । उनीहरुलाई अहिले नै भाडा चाहियो भन्दै घरबाट निकाल्नु कतिको जायज हो घरबेटी बा ? हामी रह्यौ भने, जीवन रह्यो भने पैसा त कमाउँला, घरभाडा उठाउँला, पिकनिक जाउँला, रमाइलो गरौँला यदि मानव जीवन नै रहेन भने त्यो पैसाको के काम घरबेटी बा ?
प्रिय घरबेटी बा,
तपाईले यस्तो विषम परिस्थितिमा डेरावाल हरुलाई घरबाट निकाल्नु उचित लागेन । हो, तपाईको घर हो तपाईको अधिकार छ तर बर्षौ देखि तपाईको घरमा बसेर धेरैको सपना पुरा गर्ने मानिसलाई निकाल्नु उचित छैन । तपाइको घरको भाडा दिन केही ढिलाई भयो होला, नेपालमा मात्र हैन विश्वमा नै अर्थतन्त्र तहस–नहस भएको छ । आज जीवन रह्यो भने तपाईको घर भाडा त २ महिना पछि पनि दिन सकिन्छ नी हैन र ? जीवन नै नरहे त न तपाइको घर भाडा आउँछ, न त उसका अधुरा सपना सपना पूरा हुन्छन् ।
त्यसैले घरबेटी बा, तपाईलाई फेरि पनि म विन्ती चढाउँछु, मानवीयता देखाऊँ सबै मिलेर कोरोना सँग लडौँ, अनि देश बनाउन लडौँ, पैसा त कमाउँला नी तपाई हामी सँगै मिलेर अगाडी बढे देश अगाडी बढ्छ की ?
घरबेटी बा, मैले लेखेको कुराले केहि चित्त दुख्यो भने क्षमा चाहन्छु ।
– उही गाउँबाट काठमाडौँ पस्दै जापान पुगेको ठिटो
