दुबई (युएई)– भारतीय जि टिभी च्यानलद्वारा प्रसारित चर्चित डिआइडी लिटिल मास्टर सिजन थ्र का विजेता तेरिया फौजा मगर, गायिका, नायिका र मोडेल छुल्थिम डोल्मा गुरुङ र नेपाल आदिवासी जनजाति महासंघका केन्द्रीय अध्यक्ष नरेन्द्र कुमाल दुबईमा आउने भएका छन् ।
आगामी २९ अगस्तका दिन दुबईस्थित शेख राशिद अडिटोरियम हलमा २० औं विश्व आदिवासी जनजाति दिवस २०१४ को अवसरमा हुने भएको ‘नेपाली कल्चर शो’ सांगीतिक कार्यक्रमका लागि आउने भएका हुन् ।
उक्त कुरा शुक्रबार दुबईको नेपाली रेष्टुरेण्टमा नेपाल आदिवासी जनजाति महासंघ युएईद्वारा गरिएको पत्रकार सम्मेलनमा अध्यक्ष डिआर गुरुङले जानकारी दिएका हुन् ।
‘लिटिल मास्टर सिजन थ्री’ का विजेता भएपछि बिदेशको भ्रमणमा व्यस्त रहेकी तेरिया मगर दुबईमा आउने खबरले युएईका दर्शकहरु निकै उत्साहितमा छन् । तेरिया मगरका साथ नायिका छुल्थिम गुरुङ र यएईका ख्यातिप्राप्त कलाकारहरुको पनि वेजोड प्रस्तुति रहने भएको छ । सोही अवसरमा नेपाल आदिवासी जनजाति महासंघका केन्द्रीय अध्यक्ष नरेन्द्र कुमालले विशेष सम्बोधन गर्ने कार्यक्रम छ ।
युएईको सन्दर्भमा आयोजना गरिने कार्यक्रमहरुमध्ये पहिलो पटक एक लाख बीस हजार दिरामको लगानीमा ऐतिहासिक कार्यक्रम हुने आयोजक बताउँछन् । जीटिभीसँग समन्वय भएर गरिने यस कार्यक्रममा केवल नेपालीहरु मात्र नभएर गैरनेपालीहरुको पनि सहभागिता रहने भएको छ ।
कार्यक्रममा प्रवेशका लागि महिलाहरुलाई बिशेष छुटका साथ ३५ दिराम र पुरुषहरुका लागि ५० दिराम राखिएको छ भने सिल्भर एड्मिशनको लागि १०० दिराम, गोल्ड एडमिशनको लागि १५० दिराम र डाइमण्ड एडमिशनको लागि ५०० दिराम राखिएको छ ।
कार्यक्रमका लागि टिकट बिक्री बितरण अन्तर्गत ५ पुरस्कारको व्यवस्था समेत गरिएको छ । जसमा १५ हजार दिरामको टिकट बिक्री गरेमा पुरस्कारको लागि सहभागी हुन पाउने र सबैभन्दा धेरै टिकट बिक्री गर्नेलाई प्रथम पुरस्कारको रुपमा २,००० दिराम र प्रशंसापत्र, द्वितीय पुरस्कार १,५०० दिराम र प्रशंसापत्र, तृतीय पुरस्कार १,००० दिराम र प्रशंसापत्र, चौथो पुरस्कार ७०० दिराम र प्रशंसापत्र र पाँचौ पुरस्कार ५०० दिराम र प्रशंसापत्र रहेको छ । ***
