टोकियो – जापान सरकारले आगामी जुलाईदेखि राहदानी (पासपोर्ट) दस्तुरमा उल्लेख्य कटौती गर्ने भएको छ । शुक्रबार जापानको माथिल्लो सदनले राहदानी ऐनमा संशोधन गर्दै सर्वसम्मतिले यो प्रस्ताव पारित गरेसँगै नयाँ शुल्क कार्यान्वयनमा आउने निश्चित भएको हो ।
नयाँ व्यवस्था अनुसार, १० वर्ष अवधिको राहदानीका लागि अब ९ हजार येन (करिब ५६ डलर) मात्र दस्तुर लाग्नेछ । यो हालको शुल्कको तुलनामा ७ हजार येनले कम हो ।
त्यसैगरी, १८ वर्षभन्दा कम उमेरका बालबालिका तथा किशोरकिशोरीका लागि ५ वर्षे राहदानीको शुल्क ४ हजार ५०० येन (करिब २८ डलर) तोकिएको छ । यसअघि १८ वर्ष वा सोभन्दा माथिका व्यक्तिहरूले ५ वर्षे राहदानी बनाउन पाउने व्यवस्था रहेकोमा अबदेखि त्यसलाई खारेज गरिएको छ । अब १८ वर्ष पुगेका वयस्कहरूले अनिवार्य रूपमा १० वर्षे राहदानी नै बनाउनुपर्नेछ ।
जापानले आगामी जुलाईदेखि नै देशबाहिर जाने यात्रुहरूका लागि लाग्ने ‘अन्तर्राष्ट्रिय पर्यटन कर’ बढाउने तयारी गरेको छ । यसले विदेश भ्रमण गर्ने जापानी नागरिकहरूमाथि थपिने आर्थिक भारलाई कम गर्न राहदानी शुल्कमा भारी कटौती गरिएको सरकारले जनाएको छ ।
साथै, अन्य विकसित मुलुकहरूको तुलनामा जापानमा राहदानी राख्ने नागरिकहरूको सङ्ख्या निकै कम रहेको पाइएकाले, धेरैभन्दा धेरै सर्वसाधारणलाई राहदानी बनाउन प्रोत्साहित गर्नु पनि यस निर्णयको मुख्य उद्देश्य रहेको बताइएको छ ।
