वासिङ्टन – अमेरिकी राष्ट्रपति डोनाल्ड ट्रम्पले इरानसँगको सम्भावित युद्ध र तनावलाई कसरी अगाडि बढाउलान् भन्ने विषयमा विश्वभर चासो बढेको छ । इरानसँगको विवाद उत्कर्षमा पुगेका बेला राष्ट्रपतिको आगामी योजना र ‘एक्जिट स्ट्राटेजी’ (निकास रणनीति) का बारेमा नयाँ तथ्यहरू बाहिर आएका छन् ।
हालै टेनेसी राज्यको भ्रमण र एल्भिस प्रेस्लीको ऐतिहासिक निवास ‘ग्रेसल्याण्ड’ को भ्रमणका क्रममा बीबीसीका संवाददाता एन्थोनी जर्करले ट्रम्पको लक्ष्यबारे केही महत्वपूर्ण जानकारी संकलन गरेका छन् । प्राप्त जानकारी अनुसार, ट्रम्पका पछिल्ला कदम र अभिव्यक्तिहरू विरोधाभासपूर्ण देखिएका छन् ।
राष्ट्रपति ट्रम्पले एकातर्फ इरानसँगको सैन्य अपरेसनलाई ‘थन्क्याउँदै’ लैजाने बताएका छन् भने, अर्कोतर्फ इरानले ‘स्ट्रेट अफ हर्मुज’ मा लगाएको नाकाबन्दी नहटाए त्यहाँका पावर प्लान्टहरू ‘ध्वस्त’ पारिदिने कडा चेतावनी समेत दिएका छन् । केही समयअघि मात्र ट्रम्पले इरानमाथि हुने भनिएको हवाई आक्रमणलाई अन्तिम समयमा स्थगित गरेका थिए । उनले इरानसँग ‘सकारात्मक वार्ता’ भइरहेका कारण आक्रमण रोकेको दाबी गरे पनि इरानी अधिकारीहरूले भने अमेरिकासँग कुनै पनि प्रकारको संवाद नभएको भन्दै ट्रम्पको दाबीलाई खण्डन गरेका छन् ।
अमेरिका र इरानबीचको बढ्दो खाडललाई कम गर्न अन्तर्राष्ट्रिय स्तरमा मध्यस्थताको प्रयास पनि तीव्र पारिएको छ । पाकिस्तान, टर्की र इजिप्ट लगायतका मुलुकहरूले वासिङ्टन र तेहरानबीच समझदारी कायम गराउन भूमिका खेलिरहेका छन् ।
यसैबीच, अमेरिकी राजनीतिमा एउटा नयाँ मोड देखा परेको छ । लामो समयसम्म चल्ने वैदेशिक युद्धका कडा आलोचक मानिने उपराष्ट्रपति जेडी भान्स स्वयं इरानसँगको वार्तामा सहभागी हुन सक्ने रिपोर्टहरू सार्वजनिक भएका छन् । राजनीतिक विश्लेषकहरूका अनुसार, यदि भान्सले वार्ताको कमान्ड सम्हालेमा ट्रम्प प्रशासनको इरान रणनीतिमा ठूलो परिवर्तन आउन सक्छ । यसलाई ट्रम्पको रणनीतिमा आएको महत्वपूर्ण फेरबदलका रूपमा हेरिएको छ ।
इरानमाथिको आर्थिक प्रतिबन्ध र सैन्य दबाबका बीच ट्रम्पले अन्ततः कस्तो कदम चाल्नेछन् भन्ने कुराले मध्यपूर्वको भविष्य र विश्व राजनीतिमा ठूलो अर्थ राख्ने देखिन्छ ।
