टोकियो – जापानको आधारभूत उपभोक्ता मूल्य वृद्धिदर (मुद्रास्फीति) जनवरी महिनामा २.० प्रतिशत कायम भएको छ । सरकारी तथ्याङ्कअनुसार यो विगत दुई वर्षयताकै सुस्त वृद्धि हो ।
आन्तरिक मामिला तथा सञ्चार मन्त्रालयका अनुसार, डिसेम्बरमा २.४ प्रतिशत रहेको ‘कोर’ उपभोक्ता मूल्य सूचकांक जनवरीमा ओरालो लागेको हो । सरकारले ग्यासोलिनमा लाग्दै आएको अस्थायी कर खारेज गरेपछि मूल्य वृद्धि नियन्त्रणमा सहयोग पुगेको बताइएको छ ।
सन् २०२३ मा चामल लगायतका खाद्य सामग्रीको मूल्यमा भएको वृद्धिका कारण औसत मुद्रास्फीति ३.१ प्रतिशत पुगेको थियो । तर, पछिल्लो समय ऊर्जा र शिक्षा क्षेत्रमा सरकारको हस्तक्षेपले महँगीको चाप केही कम भएको छ । विशेषगरी उच्च माध्यमिक शिक्षालाई प्रभावकारी रूपमा निःशुल्क बनाइएपछि विद्यालय शुल्कमा ९४.१ प्रतिशतको भारी गिरावट आएको छ ।
तथ्याङ्कअनुसार खाद्य वस्तुको मूल्य अझै ६.२ प्रतिशतले बढेको छ, जसमा चामलको मूल्य २७.९ प्रतिशत र चकलेटको मूल्य २५.८ प्रतिशतले वृद्धि भएको छ । अर्कोतर्फ, ऊर्जा लागतमा ५.२ प्रतिशतले कमी आएको छ, जसमा ग्यासोलिनको मूल्य १४.६ प्रतिशतले घटेको छ ।
मुद्रास्फीतिमा आएको यो सुस्ततासँगै बैंक अफ जापानले आगामी दिनमा ब्याजदर बढाउने वा नबढाउने भन्ने विषयमा सर्वत्र चासो बढेको छ । बैंकले गत डिसेम्बरमा ब्याजदर बढाएर ०.७५ प्रतिशत पुर्याएको थियो, जुन सन् १९९५ यताकै उच्च हो ।
यसैबीच, जापानका प्रमुख ‘कन्भिनियन्स स्टोर’हरूको बिक्रीमा भने १.१ प्रतिशतको सामान्य सुधार देखिएको छ । तातो पेय पदार्थ र चिनियाँ ‘बन्स’को माग बढेका कारण लगातार ११ औँ महिना बिक्री बढेको भए पनि स्टोर पुग्ने ग्राहकको संख्यामा भने सामान्य गिरावट आएको छ ।
