टोकियो – जापानी रेलवेको करिब दुई दशक लामो परम्परालाई निरन्तरता दिँदै बुधबार ‘योन्तामा’ नामको बिरालोलाई स्थानीय रेलवे स्टेशनको तेस्रो ‘फिलाइन स्टेशनमास्टर’ (बिरालो प्रमुख) नियुक्त गरिएको छ ।
यो परम्पराले स्थानीय पर्यटन प्रवर्द्धनमा टेवा पुर्याउनुका साथै आर्थिक सङ्कटमा परेको रेलवे सेवालाई जोगाउन समेत महत्त्वपूर्ण भूमिका खेल्दै आएको छ । वाकायामा इलेक्ट्रिक रेलवे कम्पनीको किशिगावा लाइनस्थित ‘किशी स्टेशन’ मा आयोजित एक विशेष समारोहका बीच यो नियुक्ति गरिएको हो ।
सोही अवसरमा कम्पनीले आफ्नो नयाँ प्रशिक्षार्थी बिरालो ‘रोकुतामा’ लाई पनि सार्वजनिक गरेको छ । योन्तामा भन्दा अघिकी स्टेशनमास्टर ‘नितामा’ को गत वर्ष नोभेम्बरमा मृत्यु भएको थियो । कम्पनीले नितामालाई सम्मानस्वरुप ‘मानार्थ स्टेशनमास्टर’ घोषणा गरेको छ ।
सन् २००७ मा ‘तामा’ नामको बिरालोलाई पहिलो पटक स्टेशनमास्टर नियुक्त गरेपछि किशिगावा लाइनले राष्ट्रिय तथा अन्तर्राष्ट्रिय स्तरमा चर्चा बटुलेको थियो । डुब्न लागेको रेलवेलाई बचाउन सुरु गरिएको यो उपायले स्वदेशी तथा विदेशी पर्यटकहरूलाई आकर्षित गर्न ठूलो सफलता हासिल गर्यो । यसको सफलतासँगै जापानका अन्य सङ्घर्षरत स्थानीय रेलवेहरूले पनि कुकुर, खरायो तथा अन्य जनावरहरूलाई स्टेशनमास्टर नियुक्त गर्ने चलन सुरु गरेका छन् ।
वाकायामा प्रिफेक्चरको किनोकवास्थित स्टेशन भवन अगाडि आयोजित समारोहमा रेलवे कम्पनीका अध्यक्ष मित्सुनोबु कोजिमाले योन्तामाको घाँटीमा स्टेशनमास्टरको पदवी अङ्कित पदक लगाइदिएका थिए । उक्त दृश्य हेर्न भेला भएका सर्वसाधारणले ताली बजाएर नयाँ स्टेशनमास्टरको स्वागत गरेका थिए । ओसाकाबाट आएकी ५२ वर्षीया गृहिणी तथा पहिलो बिरालो स्टेशनमास्टर ‘तामा’ को पालादेखिकी प्रशंसक चिसाको आसियानोले भनिन्, ‘म आशा गर्छु कि यी बिरालो स्टेशनमास्टरहरूले किशिगावा लाइनको सधैं ख्याल राख्नेछन् ।’
