टोकियो – ओसाकाको मध्य भागमा करिब ८० वटा ‘भ्याकेसन रेन्टल’ (पर्यटकीय आवास) सञ्चालन गर्दै आएका डेनर्यु लिनका लागि पछिल्ला केही साता निकै कष्टकर बनेका छन् । नोभेम्बरको अन्त्ययता टोकियो र बेइजिङबीच बढ्दो कूटनीतिक तनावसँगै उनको फस्टाउँदो व्यवसाय एकाएक सुक्दै गएको छ ।
लिनका अनुसार, यस वर्षको अन्त्यसम्मका लागि तय भएका ६०० भन्दा बढी बुकिङहरू रद्द भइसकेका छन्, जसका कारण १,००० भन्दा बढी चिनियाँ पाहुनाहरूको आगमन रोकिएको छ । ‘घरजग्गा र पर्यटन क्षेत्रमा मैले चिनेका सबैजना अहिले संघर्ष गरिरहेका छन्,’ लिनले भने ।
उनको यो भनाइले त्यस क्षेत्रमा व्याप्त व्यावसायिक तनावलाई उजागर गरेको छ । यदि पर्यटक आउने क्रम यसरी नै रोकिइरहने हो भने यसले जापानको पर्यटन बजारमा गहिरो आर्थिक संकट निम्त्याउन सक्ने चिन्ता व्यवसायीहरूमा बढेको छ ।
जापानको दोस्रो ठूलो आर्थिक केन्द्र मानिने ओसाका चिनियाँ पर्यटनमा कति निर्भर छ भन्ने कुराको ज्वलन्त उदाहरण हो, र अहिलेको तनावको सबैभन्दा ठूलो चोट पनि यही सहरले खेपिरहेको छ । यहाँका होटल, खुद्रा पसल र रेस्टुरेन्टहरूले निरन्तर ‘बुकिङ क्यान्सिलेसन’ (रद्दीकरण) को सामना गरिरहेका छन् भने कान्साइ अन्तर्राष्ट्रिय विमानस्थलले देशभरमै सबैभन्दा बढी उडान कटौतीको मार खेपिरहेको छ ।
चिनियाँ पर्यटकहरू जापानमा सबैभन्दा बढी खर्च गर्ने समूह हुन्। जापानको ८.१ ट्रिलियन येन (५१.९ अर्ब डलर) को कुल पर्यटन राजस्वमा उनीहरूको योगदान करिब २० प्रतिशत (पाँच भागको एक भाग) रहेको छ । प्रधानमन्त्री सानाए ताकाइचीले ताइवानबारे दिएको अभिव्यक्तिपछि बेइजिङले आफ्ना नागरिकलाई जारी गरेको ट्राभल एड्भाइजरी (सुझाव) का कारण चिनियाँ पर्यटकको आगमन एक्कासि रोकिएको हो । यो गिरावटले सुस्त रहेको जापानी अर्थतन्त्रको एक मात्र आशालाग्दो क्षेत्र मानिएको पर्यटन उद्योगलाई नै जोखिममा पारेको छ ।
बजार अनुसन्धान संस्था ‘चाइना ट्रेडिङ डेस्क’ का अनुसार, हिउँद र वसन्त ऋतुको सुरुवाका लागि ओसाका आउने उडानहरूको बुकिङमा ५५ देखि ६५ प्रतिशतले गिरावट आएको छ । यो राष्ट्रिय औसतभन्दा निकै ठूलो गिरावट हो । तथ्यांकअनुसार ओसाकामा चिनियाँ पर्यटकहरूले गर्ने विलासी खर्च (लक्जरी स्पेन्डिङ) झन्डै आधाले घटेर मासिक ४ देखि ६ करोड डलरमा सीमित हुने प्रक्षेपण गरिएको छ ।
