टोकियो – जापानको पश्चिमी टापु शिकोकुमा अवस्थित एक खेलकुद पूर्वाधारले यस वर्षको प्रतिष्ठित ‘प्रिक्स भर्साइल’ अवार्डको शीर्ष उपाधि जितेको छ । रंगशालालाई विश्वकै सबैभन्दा सुन्दर एरिनाको रूपमा घोषित गरिएको स्थानीय सरकारले जनाएको छ ।
कागावा प्रिफेक्चरल सरकारका अनुसार, विश्वप्रसिद्ध आर्किटेक्चरल फर्म ‘साना’द्वारा डिजाइन गरिएको ‘कागावा प्रिफेक्चरल एरिना’ले यो सम्मान पाएको हो । जापानको कुनै पनि खेलकुद पूर्वाधारले खेलकुद वा एरिना विधामा यो सर्वोच्च अन्तर्राष्ट्रिय सम्मान प्राप्त गरेको यो पहिलो पटक हो ।
ताकामात्सु सहरमा अवस्थित यो बहुउद्देश्यीय एरिना ‘सेटो इनल्याण्ड सागर’को सामुन्ने खुल्ला स्थानमा निर्माण गरिएको छ । यसको वास्तुकला अत्यन्तै अद्वितीय छ, जसमा तीनवटा जिम्न्याजियमहरूलाई एउटै, नरम छालजस्तो देखिने छानामुनि आपसमा जोडिएको छ । यसको डिजाइनले त्यहाँ अवस्थित प्लाजा, पार्क र बन्दरगाहलाई एकै ठाउँमा ल्याउँदै सहर र समुद्रलाई जोड्ने काम गरेको छ ।
यसको डिजाइन गर्ने फर्म ‘साना’का आर्किटेक्टहरू काजुयो सेजिमा र र्यु निशिजावाले सन् २०१० मा वास्तुकला क्षेत्रको नोबेल पुरस्कार मानिने ‘प्रिट्जकर आर्किटेक्चर प्राइज’ जितिसकेका छन् । अवार्डको स्वागत गर्दै कागावाका गभर्नर तोयोहितो इकेदाले खुसी व्यक्त गरेका छन् । उनले भने, ‘यो एरिना एउटा ‘ल्यान्डमार्क’ बन्नेछ र यसले हाम्रो प्रिफेक्चरलाई विश्वव्यापी पहिचान दिलाउन मद्दत गर्नेछ भन्ने मैले आशा लिएको छु ।’
सन् २०१५ मा स्थापना भएको यो विश्व वास्तुकला तथा डिजाइन अवार्ड हरेक वर्ष पेरिसस्थित युनेस्कोको मुख्यालयमा घोषणा गरिन्छ । यसले एरिना, सङ्ग्रहालय र होटललगायत आठ विधामा विश्वका सबैभन्दा सुन्दर संरचनाहरूलाई सम्मान प्रदान गर्दछ ।
