काठमाडौं – विश्वको ध्यान यतिबेला अलास्का तानिएको छ, जहाँ शुक्रबार रुसी राष्ट्रपति भ्लादिमिर पुटिन र उनका अमेरिकी समकक्षी डोनाल्ड ट्रम्पबीच युक्रेन युद्ध अन्त्य गर्ने विषयमा शिखर वार्ता हुँदैछ । तर, यो वार्तालापको सबैभन्दा नाटकीय पक्ष के हो भने, जसको भविष्य दाउमा छ, त्यही युक्रेन भने वार्ताको टेबलमा हुने छैन ।
युक्रेनलाई बाहिर राखेर हुन लागेको यो भेटलाई वार्ता सुरु हुनुअघि नै रुस र राष्ट्रपति पुटिनका लागि ठूलो कूटनीतिक विजयका रूपमा हेरिएको छ । सुरुमा राष्ट्रपति ट्रम्पले युक्रेनी राष्ट्रपति भोलोदिमिर जेलेन्स्कीको उपस्थितिबिना वार्ता नहुने अडान लिएका थिए, तर पछि उनी आफ्नो अडानबाट पछि हटे । यसले युक्रेनलाई बाहिरै राखेर उसको भविष्य निर्धारण गर्ने जोखिम बढाएको छ, जसका कारण राजधानी किभमा गम्भीर चिन्ता र निराशा छाएको छ ।
पुटिनको जित, युक्रेनको चिन्ता
विश्लेषकहरूका अनुसार अमेरिकी भूमिमा बिना कुनै शर्त वार्ताका लागि निम्तो पाउनु नै पुटिनका लागि एक “शानदार उपलब्धि” हो । युद्ध मैदानमा रुसी सेनाले प्रगति गरिरहेको, तर अन्तर्राष्ट्रिय प्रतिबन्धका कारण आर्थिक संकट झेलिरहेको समयमा यो भेटले पुटिनलाई बलियो मनोवैज्ञानिक र कूटनीतिक धरातल प्रदान गरेको छ ।
यता, किभ भने आफ्नो अनुपस्थितिमा हुने सम्झौताले रुसले कब्जा गरेको भूभागलाई वैधता दिन सक्नेमा सबैभन्दा बढी सशंकित छ । रुसले कब्जा गरेको जमिन फिर्ता नगरी सम्झौता गर्नुपर्ने दबाब आउनसक्ने डर युक्रेनी अधिकारीहरूमा छ । युक्रेनले निरन्तर भन्दै आएको छ, “हाम्रो अनुपस्थितिमा हाम्रोबारे कुनै सम्झौता मान्य हुने छैन ।”
