टोकियो – दक्षिणपश्चिमी जापानमा सोमबारदेखि परेको मुसलधारे वर्षाका कारण आएको बाढी र पहिरोले भयानक वितण्डा मच्चाएको छ, जसमा परी कम्तीमा दुई जनाको मृत्यु भएको आशंका गरिएको छ भने अन्य धेरैजना बेपत्ता भएका छन् । स्थानीय अधिकारीहरू र उद्धारकर्मीहरूका अनुसार यस क्षेत्रमा उद्धार तथा खोजी कार्यलाई तीव्रता दिइएको छ ।
जापानको मौसम विज्ञान एजेन्सीले कुमामोतो प्रान्तका केही भागहरूमा भारी वर्षाको विशेष चेतावनी जारी गरेको थियो, यद्यपि दिउँसो यसलाई सामान्य भारी वर्षाको चेतावनीमा घटाइएको थियो । तथापि, प्रभावित क्षेत्रका बासिन्दाहरूलाई उच्च सतर्कता अपनाउन आग्रह गरिएको छ। कुमामोतोको तामाना शहरमा सोमबार बिहानसम्मको ६ घण्टामा ३७० मिलिमिटर वर्षा रेकर्ड गरिएको थियो, जुन अगस्ट महिनाभरिको औसत वर्षाभन्दा लगभग दोब्बर हो ।
कुमामोतोको कोसामा, आफ्नो परिवारसँग सुरक्षित स्थानतर्फ जाँदै गरेका एक पुरुषको गाडी पहिरोले बगाउँदा उनी बेपत्ता भएका थिए । गाडीमा रहेकी उनकी श्रीमती र दुई बालबालिकाको उद्धार गरिएको छ, तर स्थानीय प्रहरीले नजिकै मृत अवस्थामा फेला परेका एक पुरुषको पहिचान पुष्टि गरिरहेको जनाएको छ । यसैगरी, यात्सुशिरो शहरमा एक महिला आफ्नो कारसहित सिँचाइ नहरमा खसेको अवस्थामा मृत फेला परेकी थिइन् ।
कुमामोतो र छिमेकी फुकुओका प्रान्तमा मानिसहरूलाई नदीले बगाएको र पहिरोले घर तथा गाडीहरू पुरिएको जस्ता घटनाहरू पनि रिपोर्ट भएका छन् । कुमामोतोको मिसातोमा पहिरोले घर भत्किँदा पुरिएका ६० वर्षीय एक पुरुषलाई उद्धार गरी अस्पताल लगिएको छ । कामाआमाकुसाको एक क्याम्पसाइटमा पहिरोले बाटो अवरुद्ध हुँदा १५ जना पर्यटक र कर्मचारीहरू फसेका थिए, जसलाई पछि उद्धार गरिएको थियो ।
यसैबीच, फुकुओकाको फुकुत्सुमा आइतबार दिउँसो नदीले बगाएर ६० को दशकका दुई व्यक्ति बेपत्ता भएका छन् र उनीहरूको खोजी कार्य जारी छ । कागोशिमा प्रान्तको आइरामा शुक्रबारको पहिरोले घर भत्किँदा हराइरहेकी ३० वर्षीया एक महिलाको सोमबार मृत्यु भएको पुष्टि भएको छ ।
