टोकियो – जापानमा विदेशी चालकहरूका कारण हुने गम्भीर तथा घातक सवारी दुर्घटनाको संख्यामा निरन्तर वृद्धि देखिएको छ । यसै स्थितिलाई मध्यनजर गर्दै जापानको राष्ट्रिय प्रहरी एजेन्सीले पहिलो पटक विदेशी चालकसँग सम्बन्धित विस्तृत तथ्याङ्क सार्वजनिक गरेको छ भने विदेशबाट ल्याइएका चालक अनुमतिपत्र (लाइसेन्स) लाई जापानी लाइसेन्समा रूपान्तरण गर्ने नियमलाई थप कडा बनाउने घोषणा गरेको छ ।
प्रहरी एजेन्सीले जुलाईको अन्त्यमा सार्वजनिक गरेको पछिल्लो तथ्याङ्क अनुसार, सन् २०२५ को पहिलो ६ महिनामा विदेशी चालकहरूका कारण भएका गम्भीर वा मृत्युजन्य दुर्घटनाको संख्या २५८ पुगेको छ । यो संख्या अघिल्लो वर्षको सोही अवधिको तुलनामा १९ ले बढी हो र सन् २००८ यताकै सबैभन्दा उच्च हो । यस्ता दुर्घटनाहरूले कुल गम्भीर तथा घातक दुर्घटनाको २.१ प्रतिशत हिस्सा ओगटेका छन्, जुन सन् २०१५ को १.१ प्रतिशत र गत वर्षको १.९ प्रतिशतको तुलनामा उल्लेखनीय वृद्धि हो ।
दुर्घटनाको विश्लेषण गर्दा, ८४.५ प्रतिशत दुर्घटना जापानी लाइसेन्स भएका विदेशी चालकहरूबाट भएको पाइएको छ । यसमा अन्य देशबाट ल्याएर जापानी लाइसेन्समा परिवर्तन गरेका चालकहरूको संख्या उल्लेख्य रहेको अनुमान छ । यसबाहेक, ६.२ प्रतिशत दुर्घटना अन्तर्राष्ट्रिय लाइसेन्स भएका र १.९ प्रतिशत अन्य विदेशी लाइसेन्स भएका चालकहरूबाट भएका थिए । विगत केही समयदेखि सांसदहरूले विदेशी लाइसेन्सलाई जापानी लाइसेन्समा बदल्ने प्रक्रिया ‘अत्यधिक सजिलो’ भएको भन्दै आलोचना गर्दै आएका थिए । यही जनगुनासो र बढ्दो दुर्घटनालाई ध्यानमा राख्दै प्रहरी एजेन्सीले नियमहरू कडा बनाउने निर्णय गरेको हो ।
अक्टोबरदेखि नयाँ कडा नियम लागू हुने
आगामी अक्टोबर १ देखि लागू हुने नयाँ नियमअनुसार, विदेशी लाइसेन्सलाई जापानी लाइसेन्समा रूपान्तरण गर्न निकै कठिन हुनेछ । हाल १० वटा सामान्य प्रश्न सोधिने लिखित परीक्षामा अब ५० वटा प्रश्न हुनेछन् र उत्तीर्ण हुनका लागि ९० प्रतिशत अंक ल्याउनुपर्नेछ । हाल यो परीक्षामा ७० प्रतिशत अंक ल्याए पुग्थ्यो।
प्रयोगात्मक (ड्राइभिङ) परीक्षा पनि थप कडा बनाइनेछ, जसमा पैदलयात्री क्रसिङ र रेलवे क्रसिङ जस्ता नियमहरूको पालनालाई विशेष जाँच गरिनेछ । अर्को महत्वपूर्ण परिवर्तनमा, अब लाइसेन्स बदल्नका लागि जापानमा बसोबास गरेको आधिकारिक प्रमाण (住民票) अनिवार्य गरिएको छ, जसले गर्दा पर्यटकहरूले होटलको ठेगाना प्रयोग गरेर लाइसेन्स लिने बाटो बन्द हुनेछ ।
जापानमा विदेशी नागरिकको संख्या बढ्दो क्रममा छ, जसले गर्दा सडकमा विदेशी चालकहरूको उपस्थिति पनि बाक्लिएको छ । पछिल्लो तथ्याङ्कले जापानमा विदेशीहरूको संख्या ३६ लाख नाघिसकेको देखाउँछ । दुर्घटनामा संलग्न विदेशी चालकहरूको राष्ट्रियता हेर्दा, दक्षिण तथा उत्तर कोरियाली र चिनियाँ नागरिकहरू सबैभन्दा अगाडि छन् । दुवै देशका नागरिकहरूबाट ५१-५१ वटा (१९.८ प्रतिशत) दुर्घटना भएका छन् । त्यसपछि भियतनामी चालकहरू (३१ घटना, १२.० प्रतिशत) र ब्राजिलियन चालकहरू (२५ घटना, ९.७ प्रतिशत) रहेका छन् ।
सन् २००५ पछि विदेशी चालकहरूबाट हुने दुर्घटनामा कमी आएको थियो, तर हालका वर्षहरूमा यो प्रवृत्ति उल्टिएर दुर्घटनाको संख्या फेरि बढ्न थालेको प्रहरी एजेन्सीले जनाएको छ । नयाँ नियमले जापानको ट्राफिक नियमबारे विदेशी चालकहरूलाई पूर्ण रूपमा जानकार बनाउने र सडक सुरक्षा अभिवृद्धि गर्ने अपेक्षा गरिएको छ ।
