काठमाडौं – भारतको उत्तराखण्ड प्रदेशमा हालैको भीषण बाढीपहिरोमा परी बेपत्ता भएका नेपाली नागरिकमध्ये हालसम्म कसैको पनि मृत्युको पुष्टि नभएको भारतस्थित नेपाली दूतावासले स्पष्ट पारेको छ । दूतावासले शुक्रबार एक विज्ञप्ति जारी गर्दै पाँच नेपाली नागरिक अझै हराइरहेको तर उद्धार तथा खोजी कार्यलाई तीव्रताका साथ अघि बढाइएको जनाएको हो ।
दूतावासले प्रभावित क्षेत्रमा रहेका नेपालीहरूको अवस्था पहिचान, बेपत्ताहरूको खोजी, घाइतेहरूको उपचार र अन्य आवश्यक सहयोगका लागि उत्तराखण्ड राज्य सरकारका सम्बन्धित निकायहरू तथा भारतको केन्द्रीय विदेश मन्त्रालयसँग निरन्तर समन्वय गरिरहेको जनाएको छ ।
विज्ञप्तिमा भनिएको छ, ‘बाढीपहिरोपछि त्यस क्षेत्रमा रहेका नेपालीहरूको अवस्था, हराइरहेका नेपालीहरूको खोजी तथा उद्धार, घाइतेहरूको उपचार एवं अन्य आवश्यक सहयोगका लागि राजदूतावासले निरन्तर रूपमा समन्वय गरिरहेको छ ।’
दूतावासका अनुसार, उत्तराखण्डको पौडी गढवालस्थित बागोडामा अचानक आएको बाढीमा परी पाँच जना नेपाली बेपत्ता भएका थिए । घटनापछि सञ्चालित खोजी अभियानमा हालसम्म ३७२ जनाको सकुशल उद्धार गरिएको छ भने घटनास्थलबाट दुई जनाको शव फेला परेको छ । यद्यपि, फेला परेका शव नेपाली नागरिकको हो वा होइन भन्ने अझै पहिचान भइसकेको छैन ।
यसैगरी, बाढीमा परी घाइते भएका चार जना नेपाली नागरिकमध्ये तीन जना उपचारपछि स्वास्थ्य लाभ गरी घर फर्किसकेका छन् । एक जना घाइतेको भने स्थानीय अस्पतालमा उपचार जारी रहेको दूतावासले जानकारी दिएको छ । दूतावासले स्थितिलाई नजिकबाट नियालिरहेको र हराइरहेका नागरिकहरूको सकुशल खोजी तथा प्रभावितहरूलाई आवश्यक राहत उपलब्ध गराउन हरसम्भव प्रयास जारी राखेको आश्वासन दिएको छ ।
