टोकियो – मध्य जापानको शिझुओकास्थित एक सामुदायिक केन्द्रमा शनिबार साँझ आयोजित एक भेलाका क्रममा छुरा प्रहारबाट एक ७८ वर्षीय पुरुषको मृत्यु भएको प्रहरीले जनाएको छ ।
प्रहरीका अनुसार, मृतक योशियुकी इशिगामीमाथि साँझ करिब ७:३० बजे आक्रमण भएको थियो । आक्रमणमा संलग्न ५० वर्षको दशकका एक व्यक्ति भेलामा सहभागी नभएको तर एक्कासी कार्यक्रमस्थलमा प्रवेश गरी इशिगामीलाई छुरा प्रहार गरेको बताइएको छ । उपस्थित अन्य व्यक्तिहरूले उनलाई नियन्त्रणमा लिएका थिए ।
प्रहरीले घटनास्थलबाट थुप्रै चक्कुहरू बरामद गरेको छ । आक्रमणकारी आफैँले आफूलाई चोट पुर्याएको हुनसक्ने अनुमान गरिएको छ र उनलाई उपचारका लागि अस्पतालमा भर्ना गरिएको छ । घटनामा अन्य कुनै पनि सहभागीलाई चोटपटक भने लागेको छैन ।
यो घटना जेआर शिझुओका स्टेशनबाट करिब ४ किलोमिटर दक्षिणमा रहेको एक आवासीय क्षेत्रमा भएको हो । घटनापछि एक स्थानीय ५३ वर्षीया महिलाले आफूलाई असुरक्षित महसुस भएको बताउँदै भनिन्, ‘यो साँच्चै डरलाग्दो छ ।’
