काठमाडौं– स्थानीय विकास मन्त्री टोपबहादुर रायमाझीले शान्ति प्रक्रिया निष्कर्समा पुगेर नयाँ संविधान जारी हुन नसके मुलुक असफल हुने चेतावनी दिएका छन् ।रिपोर्टर्स क्लब नेपालले शान्ति र संविधानको लागि दवावमुलक देउसी भैलो कार्यक्रममा बोल्दै मन्त्री रायमाझीले तीन वर्षसम्म हुन नसकेको काम एक महिनामा गर्नु चुनौतीपूर्ण भए पनि बाँकी अवधीमा सो जिम्मेवारी पुरा हुने विश्वास ब्यक्त गरे ।
मन्त्री रायमाझीले मुलुकको समृद्धिकोलागी स्थीरता, स्थीरताकोलागी शान्ति र शान्तिकालागी सहमति अनिवार्य भएको भन्दै कसैले विरोधमा कालो झण्डा देखाएपनि सहमतिको विकल्प नरहेको दावी गरे । उनले अन्तिम समयसम्म भएपनि दलहरुवीच सहमति बन्ने भन्दै यसको विरोध गर्नेहरु राष्ट्र विरोधी भएको ठोकुवा गरे ।
राजनीतिक ब्यवस्था र एजेण्डामा परिवर्तन भए पनि अझैसम्म पनि केही समूहहरुमा अहिले पनि यूद्ध र राजाको धङ्गधङ्गी बाँकी रहेको दावी गर्दै रायमाझीले यसले राम्रो काम गर्ने वा नगर्नेलाई चिन्ने अवसर पाएको बताए । उनले भने– ‘यसले कोसँग संघर्ष र को सँग एकता गर्ने भन्ने कुरा प्रष्ट भएको छ ।’
