टोकियो – प्रशान्त महासागरमा रहेको जापानको एक विकट टापुलाई ‘टापु’ नभई केवल ‘ढुङ्गा’ मात्र भएको भन्ने चीनको दाबीलाई जापान सरकारले कडा रूपमा अस्वीकार गरेको छ । जापानका मुख्य सरकारी प्रवक्ताले उक्त टापुको हैसियत र त्यसमाथि टोकियोको नियन्त्रण ‘पहिले नै स्थापित र निर्विवाद’ भइसकेको बताएका छन् ।
जापानका मुख्य क्याबिनेट सचिव मिनोरु किहाराले बुधबार आयोजित पत्रकार सम्मेलनमा चीनको तर्कलाई ‘आधारहीन’ संज्ञा दिए । उनले भने, ‘ओकिनोत्तोरी संयुक्त राष्ट्रसंघीय समुद्री कानुनसम्बन्धी महासन्धि अन्तर्गत परिभाषित एक टापु हो र यसको आफ्नै ‘विशेष आर्थिक क्षेत्र’ तथा ‘महाद्वीपीय तल्लो सतह’ रहेको छ ।’
किहाराको यो भनाइ चीनको त्यो दाबीपछि आएको हो, जसमा बेइजिङले ओकिनोत्तोरी वरपरको जलक्षेत्र जापानको विशेष आर्थिक क्षेत्रभित्र नपर्ने बताएको थियो । चीनले उक्त संरचना ‘टापु नभई ढुङ्गा’ भएको जिकिर गर्दै त्यहाँ जापानको कुनै अधिकार नरहेको दाबी गरेको थियो । यो कूटनीतिक वाक्युद्ध त्यतिबेला सुरु भयो, जब गत आइतबार चिनियाँ नौसेनाको एउटा युद्धपोतले सो टापु नजिकैको समुद्री क्षेत्रमा ‘लाइभ-फायर’ (प्रत्यक्ष गोलाबारी) को अभ्यास गरेको थियो ।
टोकियोबाट करिब १७ सय किलोमिटर दक्षिणमा अवस्थित ओकिनोत्तोरी जापानको सबैभन्दा दक्षिणी टापु हो । यो करिब ११ किलोमिटर घेरा भएको एउटा ‘टेबल रिफ’ (समुद्री चट्टानको घेरा) हो । समुद्री ज्वारभाटा उच्च भएको बेला यो टापुको अधिकांश भाग पानीमुनि डुब्छ, केवल दुईवटा भागहरू मात्र पानीमाथि देखिन्छन्, जसलाई जापानले कङ्क्रिटको संरचना बनाएर थप मजबुत पारेको छ ।
मुख्य क्याबिनेट सचिव किहाराका अनुसार जापानले सन् १९३१ को जुलाईमा सार्वजनिक सूचना जारी गरेदेखि नै यस टापुमाथि निरन्तर र प्रभावकारी रूपमा आफ्नो नियन्त्रण कायम राख्दै आएको छ ।
