टोकियो – विश्वकपमा जापानी टोलीलाई ऐतिहासिक मोडमा पुर्याएका मुख्य प्रशिक्षक हाजिमे मोरियासुले आगामी एसियन कपसम्मका लागि नयाँ सम्झौतामा हस्ताक्षर गरेका छन् । जापानी सञ्चारमाध्यमहरूका अनुसार, ५७ वर्षीय मोरियासुले साउदी अरबमा आयोजना हुने यस प्रतियोगितामा ‘सामुराई ब्लु’को नेतृत्व गर्नेछन् ।
आगामी वर्ष जनवरी ७ देखि फेब्रुअरी ५ सम्म साउदी अरबमा हुने एसियन कपसँगै मोरियासुको कार्यकाल पनि समाप्त हुनेछ । एसियन कपमा जापानको नतिजा जस्तोसुकै आए पनि मोरियासुले आफ्नो पद छाड्नेछन् । जापान फुटबल एसोसिएसनले उनको उत्तराधिकारीको रूपमा हाल २३ वर्षमुनिको टोली हेरिरहेका प्रशिक्षक गो ओइवालाई चयन गरिसकेको छ ।
सन् २०१८ को रसिया विश्वकप लगत्तै जिम्मेवारी सम्हालेका मोरियासु जापानको इतिहासमा सबैभन्दा लामो समयसम्म सेवा गर्ने प्रशिक्षक हुन् । उनको नेतृत्वमा जापानले विश्व फुटबलमा ठूला शक्तिहरूलाई चुनौती दिएको छ ।
२०२२ विश्वकप: जर्मनी र स्पेन जस्ता महारथी टोलीलाई स्तब्ध पार्दै जापान अन्तिम १६ मा पुगेको थियो ।
२०२६ विश्वकप: उत्तर अमेरिकामा हालै सम्पन्न विश्वकपमा जापान अन्तिम ३२ को चरणमा पुग्यो, जहाँ पाँच पटकको च्याम्पियन ब्राजिलसँग इन्जुरी समयमा गोल खाँदा २–१ ले पराजित हुँदै बाहिरिनु परेको थियो ।
मोरियासुले आफ्नो कार्यकालमा दुईवटा एसियन कप, एक कोपा अमेरिका र सन् २०२१ को टोकियो ओलम्पिकमा जापानको सफल नेतृत्व गरिसकेका छन् ।
आगामी एसियन कपका लागि जापान समूह ‘एफ’ मा परेको छ । यस समूहमा जापानले साविक विजेता कतारसहित थाइल्याण्ड र इन्डोनेसियाको सामना गर्नेछ। जापान एसियन कपको इतिहासमा सबैभन्दा सफल टोली हो, जसले हालसम्म कीर्तिमानी चार पटक उपाधि जितेको छ । यद्यपि, सन् २०११ पछि जापानले यो उपाधि उचाल्न सकेको छैन ।
सन् २०२४ मा कतारमा भएको पछिल्लो संस्करणमा जापान क्वाटरफाइनलमा इरानसँग पराजित हुँदै बाहिरिएको थियो । त्यसैले, मोरियासुका लागि आफ्नो बिदाई सुखद बनाउन र जापानलाई पाँचौँ पटक एसियाली च्याम्पियन बनाउन यो अन्तिम र महत्त्वपूर्ण अवसर हुनेछ ।
