काठमाडौं – भेनेजुएलाका अपदस्थ राष्ट्रपति निकोलस मादुरोलाई पहिलो पटक अमेरिकी सङ्घीय अदालतमा उपस्थित गराइएको छ । अमेरिकी सेनाले भेनेजुएलाको राजधानी काराकासबाटै नियन्त्रणमा लिई न्युयोर्क पुर्याएका मादुरोले अदालतको कठघरामा उभिएर आफूमाथि लागेका सबै आरोपको प्रतिवाद गरेका छन् ।
सङ्घीय लागूऔषध ओसारपसार तथा ‘नार्को-टेररिज्म’ (लागूऔषध आतङ्कवाद) जस्तो गम्भीर अभियोग खेपिरहेका मादुरोले सोमबार न्यायाधीशसमक्ष आफू निर्दोष रहेको जिकिर गरे । नीलो जेल पोशाकमा श्रीमतीसहित अदालतमा उपस्थित भएका उनले आफ्नो ओहोदाको दाबी छोडेनन् । न्यायाधीशलाई सम्बोधन गर्दै उनले भने, ‘म निर्दोष छु । म कुनै अपराधी होइन, एक असल मानिस हुँ र आफ्नो देशको बहालवाला राष्ट्रपति हुँ ।’
मादुरोको इन्कारी बयानपछि अदालतले मुद्दाको अर्को सुनुवाइ आगामी मार्च १७ का लागि तोकेको छ । मादुरोको यो गिरफ्तारी र अदालती उपस्थितिले अमेरिकामा एक जटिल कानुनी लडाइँको सङ्केत गरेको छ । अर्को देशको राष्ट्रप्रमुख (जो आफूलाई बहालवाला दाबी गर्छन्) माथि अमेरिकी भूमिमा मुद्दा चलाउने क्षेत्राधिकारको विषय पेचिलो बन्न सक्ने अन्तर्राष्ट्रिय सञ्चारमाध्यम बीबीसीले उल्लेख गरेको छ । पूर्वराष्ट्रपति डोनाल्ड ट्रम्पको प्रशासनले तयार पारेको अभियोगपत्रलाई आधार मानेर उनलाई काराकासबाटै पक्राउ गरी न्युयोर्क ल्याइएको हो ।
कुख्यात अपराधीहरूको माझमा मादुरो
मादुरोलाई हाल न्युयोर्कको ब्रुकलिनस्थित ‘मेट्रोपोलिटन डिटेन्सन सेन्टर’ (एमडीसी) मा राखिएको छ । सन् १९९० को दशकमा स्थापित यो कारागार ‘हाई प्रोफाइल’ अपराधी र गिरोहका नाइकेहरूलाई थुन्ने स्थानका रूपमा कुख्यात छ ।
हाल करिब १ हजार ३०० कैदीबन्दी रहेको यस कारागारमा मादुरो एक्ला ‘भिआइपी’ कैदी भने होइनन् । यसअघि होन्डुरसका पूर्वराष्ट्रपति जुआन ओरल्यान्डो हर्नान्डेजलाई पनि सयौँ टन कोकिन तस्करीको अभियोगमा यहीँ राखिएको थियो। उनलाई पछि राष्ट्रपति ट्रम्पले माफी दिएर रिहा गरेका थिए । अहिले उक्त कारागारमा मेक्सिकन ड्रग कार्टेलका नाइके इस्माइल ‘एल मायो’ जाम्बाडा र युनाइटेड हेल्थकेयरका सीईओको हत्या अभियोग लागेका लुइगी मान्जियोनीजस्ता चर्चित अभियुक्तहरू पनि थुनामा छन् । य
