काठमाडौं – सिद्धार्थ बैंक नेपाल प्रिमियर लिग (एनपीएल) मा चितवन राइनोजले कर्णाली याक्सलाई ४ विकेटले पराजित गर्दै प्रतियोगितामा शानदार जित दर्ता गरेको छ । मंगलबार भएको रोमाञ्चक खेलमा कर्णालीले दिएको १६७ रनको चुनौतीपूर्ण लक्ष्य चितवनले १९.१ ओभरमा ५ विकेटको क्षतिमा पूरा गर्यो ।
चितवनको जितमा विदेशी खेलाडी रवि बोपाराले अर्धशतकीय पारी खेल्दै महत्वपूर्ण ५२ रनको योगदान दिए । उनलाई दीपक बोहराले ४२ रन र सैब जैबले ३८ रन बनाएर उत्कृष्ट साथ दिए । कुशल मल्लले पनि २० रनको आक्रामक पारी खेले ।
कर्णालीका बलरहरूले चितवनलाई सहजै जित्न भने दिएनन् । सोमपाल कामीले २ विकेट लिँदै आफ्नो अनुभव प्रदर्शन गरे भने उनिस सिंह र युवराज खत्रीले १-१ विकेट लिएर चितवनमाथि दबाब सिर्जना गर्ने प्रयास गरे ।
यसअघि टस जितेर ब्याटिङ गरेको कर्णाली याक्सले निर्धारित २० ओभरमा ३ विकेट गुमाएर १६६ रनको बलियो योगफल खडा गरेको थियो । कर्णालीका लागि प्रियांक पञ्चालले ९० रनको विष्फोटक पारी खेले। उनलाई पवन सर्राफले २७, म्याक्स उडले २० र मार्क वाटले १६ रन बनाएर साथ दिएका थिए ।
चितवनका बलरहरूमध्ये सोहैल तनविर, सैफ जैब र रवि बोपाराले १-१ विकेट लिएका थिए । चितवनको यो जितले प्रतियोगितामा उनको स्थितिलाई थप सुदृढ बनाएको छ भने कर्णालीलाई थप रणनीति बनाउनुपर्ने चुनौती थपिएको छ ।
