टोकियो – ८९ वर्ष पूरा गर्न लागेकी योशिको आबे अहिले पनि प्रत्येक दिन जिम जान्छिन् र आफ्नै आवासीय कम्प्लेक्समा हुने निःशुल्क मेकअप कक्षामा भाग लिन्छिन् । वर्षौंपछि फाउन्डेशन र गुलाबी लिपिस्टिक लगाइन्, जसले उनको अनुहारमा नयाँ चमक ल्यायो । ‘यो धेरै नै उपयोगी रह्यो,’ उनले हाँस्दै भनिन् ।
जापान संसारकै सबैभन्दा छिटो बुढ्यौलीतर्फ गइरहेको देश हो, जहाँ कुल जनसंख्याको चौथाइभन्दा बढी, ३ करोड ६० लाख मानिसहरू ६५ वर्षभन्दा माथिका छन् । आउँदो दश वर्षभित्र यो अनुपात तीन मध्ये एक हुनेछ ।
र अहिले जापानी व्यवसायिक कम्पनीहरू अब यस्ता ‘जवान मुटु भएका’ ग्राहकलाई लक्षित गरिरहेका छन् । मिजुहो बैंकको अध्ययनअनुसार, वृद्धहरूका लागि केन्द्रित बजार सन् २०२५ सम्ममा १०० ट्रिलियन येनभन्दा माथि पुग्ने अनुमान गरिएको छ । यो व्यापार अब केवल औषधि वा वृद्धाश्रममा सीमित छैन । बरु, यो सक्रिय उपभोक्तावादसँग जोडिएको छ । आर्टिफिसियल इन्टेलिजेन्स (AI) र रोबोटिक्सको विकासले वृद्धहरूको सुविधाका लागि नयाँ प्रविधिहरूको पनि विकास गरिरहेको छ ।
केइओ विश्वविद्यालयका व्यवसाय प्राध्यापक अकीरा शिमिजुका अनुसार, अहिलेका वृद्धहरूलाई ‘कूल हजुरबुबा र क्युट हजुरआमा’ भन्न सकिन्छ । उनीहरू फेसन, विलासी सामान र स्वास्थ्य सम्बन्धी उत्पादनहरूमा उत्तिकै रुचि राख्छन् । ‘उनीहरू आफ्नै पहिचान झल्काउने पहिरन र मेकअपको बारेमा सोच्ने गर्छन्,’ शिमिजुले भने ।
विलासी क्रुज यात्रा, पुराना गीतहरूको लाइभ कन्सर्ट जस्ता कार्यक्रमहरूमा वृद्धहरूको सहभागिता उल्लेखनीय रूपमा बढेको छ । उनीहरू साथीहरूसँग बाहिर जान, डेटिङ गर्न चाहन्छन्, र आफूलाई आकर्षक देखाउने चाहना राख्छन् । शिसेडो कम्पनीकी मेकअप प्रशिक्षक मिओवा हिराकुका अनुसार, अनुहारको मसाज गर्दा लार ग्रन्थिहरू सक्रिय हुन्छन्, जसले स्वास्थ्यलाई राम्रो बनाउँछ । साथै, मेकअप गर्दा औंलाहरू चलाउनुपर्ने भएकाले यसले हातको मांसपेशीलाई पनि सक्रिय बनाउँछ ।
१८७२ मा फार्मेसीका रूपमा स्थापित शिसेडो कम्पनीले देशभर वृद्धहरूका लागि निःशुल्क मेकअप कक्षा सञ्चालन गरिरहेको छ । ‘मेकअप लगाउनु भनेको केवल सुन्दर देखिनु मात्र होइन, यसले जीवनमा सकारात्मक ऊर्जा दिन्छ,’ प्रशिक्षक हिराकुले भनिन् ।
८५ वर्षीय योशिहिको होट्टा, जो लगभग ३० जनाको कक्षामा सहभागी एक मात्र पुरुष थिए, लिपिस्टिक त लगाएनन्, तर हातको क्रिम लगाउन उत्सुक देखिए । साथै, उनले व्यायामसमेत गरे । उमेरका कारण केही शारीरिक समस्या भए पनि उनले आत्मविश्वासपूर्वक भने, ‘मलाई लाग्दैन कि उमेर कुनै बाधा हो ।’
