साथमा शुभकामना आदानप्रदान कार्यक्रम पनि
दुबई– आगामी १६ अक्टोबर शुक्रबारका दिन दुबईको झिलीमिली रमाइलो सहरको बिचैबिचमा पर्ने अति नै हरियो र सुविधा भएको जाविल पार्कमा नेपालीहरुको ठूलो पर्व वडा दसैंको शुभकामना आदानप्रदानका साथ विविध साँस्कृतिककार्यक्रम सहित भव्य वनभोज कार्यक्रम गरिने भएको छ । सो कार्यक्रम सिन्धुपाल्चोक सेवा समाज युएईद्वारा दसैंको अवसरमा गर्न लागिएको हो ।
पूर्खादेखि चालिआएको रितीरिवाज र परम्परा अनुसार मनाइने वडा दसैंलाई युएईस्थित कार्यरत सम्पूर्ण नेपाली दाजुभाइ तथा दिदीबहिनीरुलाई एक साथ सामुहिक जमघट गराई मनाउन लागिएको हो । त्यसै पनि दशैंमा छुट्टीमा घर जानेहरुको धुइरो रहन्छ । जो घर जाँदैनन् उनीहरुको लागि राम्रो मौका बनेको पाइन्छ । दैनिक आ–आफ्नो ड्यूटीमा व्यस्तता रहेता पनि सार्वजनिक विदाका दिन रमाइलो गरी पर्व मनाउन पाउँदा घरको तिर्सना भुलेर रमाएको देख्न सकिन्छ ।
त्यस दिनको अझै मूख्य आर्कषक विभिन्न नेपाली परिकारका खानाका साथ सेलरोटी र आलुको अचार रहने छ । सँधैभरी खरको खाना खाई रहनेहरुलाई नेपाली परिकारले नौलो स्वाद दिलाउने आशा गरिएको छ । कार्यक्रमलाई स्वादिलो, रोचक र मनोरञ्जनात्मक बनाउनको लागि आयोजक टिम संशक्त रुपमा लागि परेको सिन्धुपाल्चोक सेवा समाज युएईका अध्यक्ष विदुर न्यौपानेले बताउनु भएको छ ।
उक्त कार्यक्रममा स्थानीय कलाकारहरुको प्रस्तुतिमा विभिन्न मनोरञ्जनात्मक साँस्कृतिक प्रस्तुतिहरु पनि प्रस्तुत गरिने आयोजकले जनाएको छ । यस्ता खालका कार्यक्रमहरुले केवल मनोरञ्जन र पर्वको रुपमा मात्र नभएर नेपाली संस्कृतिको उत्थान गर्नुका साथै एकआपसमा भाईचारा र सत्भावको बिकास बढाएको पाइन्छ । यसै समाचारलाई आधार मानेर सो अवसरमा उपस्थित हुनका लागि आयोजकले अनुरोध समेत गरेको छ ।
