अड्डु (माल्दिभ्स)– माल्दिभ्समा रोजगार गरी बस्ने नेपालीहरुको संगठन नेपाल माल्दिभ्स मैत्री समाजले त्यहाँ रहेका नेपालीहरुको समस्याको विषयमा प्रधानमन्त्री डा. बाबुराम भट्टराईलाई ध्यान आर्कषित गराउँदै ज्ञापन पत्र बुझाएको छ ।ज्ञापन पत्रमा उनीहरुले माल्दिभ्समा नेपालको दुतावास नहुँदा पासपोर्ट सहित विभिन्न समस्यामा पहल गर्ने आधिकारिक निकाय नभएको भन्दै तत्काल दुतावास खोल्न पहल गर्न अग्रह गरेका छन् । त्यसैगरी नेपालमा पर्यटनको विकास र नेपाली दक्ष कामदारहरुलाई माल्दिभ्समा रोजगारीको लागि सहज अवस्था बनाउन नेपाल र माल्दिभ्सवीचको सिधै फ्ल्याइटको ब्यवस्था गर्नु पर्ने माग पनि ज्ञापनपत्रमा उनीहरुले गरेका छन् । त्यसैगरी नेपाली कामदारलाई अधिकार र पहिचान दिन माल्दिभ्ससँग श्रम सम्झौता गर्न पनि उनीहरुले प्रधानमन्त्रीको ध्यान आर्कषित गरेका छन् ।
माल्दिभ्समा ५ हजारको संख्यामा नेपाली कामदारहरु रहेको नेपाल माल्दिभ्स मैत्रि समाजका सल्लाहकार चित्रराज पौडेलले जानकारी दिनुभयो । जसमध्यै धेरै होटलमा र केही निर्माण र घरेलू कामदारको रुपमा रहेका छन् । पौडेलले होटलमा नेपालीको माग धेरै रहे पनि विभिन्न असुविधाका कारण आवश्यकता अनुसार नेपाली कामदार आउन नसकेको बताए । माल्दिभ्समा घरेलु कामदार र निर्माण क्षेत्रमा काम गर्ने नेपालीको अवस्था भने राम्रो नरहेको बताउनुभयो ।
ज्ञापनपत्र बुझ्दै प्रधानमन्त्री डा. बाबुराम भट्टराईले हिमाल र समुद्रबीच पर्यटकमा सम्बन्ध स्थापीत हुन सक्ने भन्दै माल्दिभ्सबाट नेपाल पर्यटक लैजान सिधा हवाई उडान र नेपालीको समस्या समाधान गर्न काउन्सिलर र दुतावासको ब्यवस्था गर्ने आश्वासन दिनुभयो । उहाँले छिट्टै नेपाल र माल्दिभ्सवीच श्रम सम्झौता गरेर नेपाली कामदारको अधिकार सुनिश्चित गर्ने तर्फ आफू सकारात्मक रहेको बताउनुभयो ।
