टोकियो – फुटबलको ‘पावरहाउस’ स्पेन १६ वर्ष लामो प्रतीक्षा अन्त्य गर्दै फिफा विश्वकप २०२६ को सेमिफाइनलमा प्रवेश गरेको छ । अमेरिकाको लस एन्जलस स्टेडियममा शनिबार भएको रोमाञ्चक क्वार्टरफाइनलमा बेल्जियमलाई २-१ ले स्तब्ध पार्दै स्पेनले अन्तिम चारमा आफ्नो स्थान सुरक्षित गरेको हो ।
खेलको ३०औँ मिनेटमा फेबियन रुइजले गोल गर्दै स्पेनलाई सुरुवाती अग्रता दिलाएका थिए । तर, ४१औँ मिनेटमा बेल्जियमका चार्ल्स डे केटलेरले उत्कृष्ट हेड गोल गरेपछि खेल बराबरीमा आएको थियो । प्रतिस्पर्धात्मक खेलको अन्त्यतिर ८८औँ मिनेटमा मिकेल मेरिनोले गोल गर्दै स्पेनको जित सुनिश्चित गरे । पाउ क्युबार्सीको प्रहार बेल्जियन गोलकिपरले पूर्ण नियन्त्रणमा लिन नसक्दा रिबाउन्ड बललाई मेरिनोले जाली चुमाएका थिए ।
सन् २०१० मा विश्वविजेता बनेयता स्पेनका लागि यो सबैभन्दा सफल विश्वकप यात्रा हो । पछिल्ला तीन संस्करणमा अपेक्षित प्रदर्शन गर्न नसकेको स्पेन १७औँ पटक विश्वकप खेल्ने क्रममा तेस्रो पटक सेमिफाइनल पुगेको हो । यसअघि स्पेन सन् १९५० र २०१० मा मात्र अन्तिम चारमा पुग्न सफल भएको थियो ।
मैदानमा १६ सट प्रहार गर्दै बेल्जियममाथि पूर्ण वर्चस्व जमाएको स्पेनले अब फाइनल प्रवेशका लागि अर्को बलियो प्रतिद्वन्द्वी फ्रान्सको सामना गर्नेछ । अर्कोतर्फ, क्वार्टरफाइनलबाट बाहिरिएसँगै बेल्जियमको विश्वकप जित्ने सपना पुनः एकपटक अधुरै रहेको छ ।
