टोकियो – जापानको क्योटो प्रान्तमा अवस्थित एउटा सानो र दुर्गम गाउँ ‘मिनामी-यामासिरो’ अहिले आफ्नो मौलिक उत्पादन ‘चिया’का कारण विश्वभर चर्चित बन्दै गएको छ । केवल २ हजार ३ सय जनसंख्या रहेको यस गाउँमा चियाकै कारण वार्षिक ६ लाख २० हजारभन्दा बढी पर्यटक पुग्ने गरेका छन् ।
कुनै समय घट्दो जनसंख्या र विकासको अभावले ओझेलमा परेको यस गाउँका बासिन्दाहरूमा ‘हामीसँग चियाबाहेक केही छैन’ भन्ने हीनताबोध थियो । तर, स्थानीय ‘रोडसाइड स्टेशन ओचा-नो-क्योटो’को स्थापनापछि त्यो सोच ‘हामीसँग चिया जस्तो अमूल्य सम्पत्ति छ’ भन्ने गर्वमा बदलिएको छ । यो स्टेशन सन् २०२४ र २०२६ मा जापानकै उत्कृष्ट ‘रोडसाइड स्टेशन’का रूपमा समेत पुरस्कृत भएको छ ।
चिया उत्पादन र यसबाट बनेका विभिन्न परिकारले गाउँको अर्थतन्त्रमा कायापलट ल्याएको छ । यहाँको वार्षिक व्यापार ७० करोड येन पुगेको छ, जुन गाउँले संकलन गर्ने कुल कर (३७ करोड येन) भन्दा झण्डै दोब्बर हो । यस परियोजनाले ७० जना स्थानीयलाई प्रत्यक्ष रोजगारी समेत दिएको छ ।
मिनामी-यामासिरोको चिया ‘उजी चिया’ ब्रान्ड अन्तर्गत बिक्री हुने भए पनि अहिले गाउँले आफ्नै ‘मुराचा’ (गाउँको चिया) लेबल सुरु गरेको छ । यहाँको ‘माच्चा’आइसक्रिम निकै लोकप्रिय छ, जुन दैनिक १ हजार ४ सय कपसम्म बिक्री हुने गर्छ । यसका साथै माच्चा पुडिङ र चियाबाट बनेका अन्य ५० भन्दा बढी नयाँ परिकारहरूले पर्यटकलाई लोभ्याउने गरेका छन् ।
हरियाली चियाका बगानहरू र पहाडी दृश्य यस गाउँका थप आकर्षण हुन् । पर्यटकहरूका लागि यहाँ चिया बगानको प्रत्यक्ष दृश्य देखिने सुविधासम्पन्न होटलहरू समेत सञ्चालनमा आएका छन् । स्थानीय स्रोत र साधनलाई सही ढंगले बजारीकरण गर्न सके एउटा सानो गाउँले पनि कसरी राष्ट्रिय र अन्तर्राष्ट्रिय स्तरमा पहिचान बनाउन सक्छ भन्ने उदाहरण मिनामी-यामासिरो बनेको छ ।
