टोकियो – जापानका १० वटा प्रान्त (प्रिफेक्चर) मा विगत एक दशकमा गैरजापानी बासिन्दाको संख्या दुई गुणाभन्दा बढीले वृद्धि भएको छ । सार्वजनिक गरेको तथ्यांकअनुसार, देशमा देखिएको तीव्र श्रम अभावको समस्या समाधान गर्न विदेशीहरू प्रमुख सहर छोडेर यस्ता क्षेत्रहरूतर्फ आकर्षित हुँदै गएको देखिएको छ ।
जापानको दक्षिण-पश्चिमी मुख्य टापु क्युसुस्थित कुमामोटो प्रान्तमा विदेशी बासिन्दाको संख्यामा सबैभन्दा उच्च वृद्धि देखिएको छ, जहाँ यो संख्या तीन गुणाले बढेको छ । विदेशी जनसंख्या वृद्धि हुने शीर्ष पाँच स्थानमा होक्काइदो, ओकिनावा र क्युसु क्षेत्रका अन्य दुई प्रान्तहरू रहेका छन् ।
गत वर्षको अन्त्यतिर ताइवान सेमीकन्डक्टर म्यानुफ्याक्चरिङ कम्पनीले कुमामोटो प्रान्तमा आफ्नो पहिलो कारखानाबाट ठूलो परिमाणमा उत्पादन सुरु गरेको थियो, जसले रोजगारी र बसोबासमा प्रभाव पारेको देखिन्छ । साथै, क्युसु र दक्षिणी टापु ओकिनावा भौगोलिक रूपमा अन्य एसियाली मुलुक र क्षेत्रहरूसँग नजिक रहेका कारण पनि यहाँ विदेशीको चाप बढेको हो ।
जापान सरकारले अन्तर्राष्ट्रिय विद्यार्थीहरूलाई स्नातक गरेपछि जापानमै बस्न प्रोत्साहित गर्न विभिन्न नीतिगत उपायहरू अपनाएको छ । यद्यपि, उनीहरूलाई प्रमुख सहरी क्षेत्रहरूमा सर्नबाट रोक्दै ग्रामीण वा अर्ध-सहरी क्षेत्रमै टिकाइराख्नु भने अहिलेको मुख्य चुनौती बनेको छ ।
सन् २०१५ र २०२५ को जनवरी १ को जनसंख्या तथ्यांक तुलना गर्दा, जापानका सबै ४७ वटै प्रान्तमा विदेशी बासिन्दाको संख्यामा वृद्धि भएको पाइएको छ। राष्ट्रिय स्तरमा हेर्दा यो संख्या १० वर्षअघिको तुलनामा १.७८ गुणाले बढेको छ ।
अर्कोतर्फ, जापानी नागरिकहरूको जनसंख्या भने ठूला सहरभन्दा बाहिरका क्षेत्रहरूमा स्पष्ट रूपमा घट्दो क्रममा छ । धेरै क्षेत्रहरूबाट युवा जनशक्ति सहरी केन्द्रहरूतर्फ पलायन भइरहेका छन्, जसले गाउँबस्ती खाली हुने क्रमलाई तीव्रता दिएको छ र देशभरि असमान जनसांख्यिकीय परिवर्तनलाई उजागर गरेको छ ।
युवा पुस्ता बाहिरिँदै गर्दा र जनसंख्या घट्दै जाँदा, गैर-जापानी बासिन्दाहरूले स्थानीय समुदायलाई जीवित राख्न महत्त्वपूर्ण भूमिका निर्वाह गर्न थालेका छन् । आधारभूत कार्यहरू सञ्चालन गर्न समेत संघर्ष गरिरहेका ग्रामीण क्षेत्रहरूका लागि विदेशी कामदारको सहभागिता अहिले ‘प्राणवायु’ सरह बन्न पुगेको छ ।
