काठमाडौं – अख्तियार दुरुपयोग अनुसन्धान आयोगले नापी कार्यालय भैरहवाका नापी अधिकृत सुग्रीव यादवविरुद्ध भ्रष्टाचारको आरोपमा विशेष अदालत काठमाडौँमा मुद्दा दायर गरेको छ । यादवमाथि सार्वजनिक पदमा रहँदा गैरकानुनी गतिविधि गरी अकुत सम्पत्ति आर्जन गरेको आरोप लागेको छ, जसमा उनको परिवारका सदस्यहरूलाई समेत प्रतिवादी बनाइएको छ ।
अख्तियारको अनुसन्धानबाट यादवले २०५३ सालदेखि २०८१ सालसम्म सार्वजनिक सेवामा रहँदा ९ करोड ३ लाख रुपैयाँ वैध आय आर्जन गरेको देखिन्छ । तर, सोही अवधिमा उनले करिब १४ करोड ८३ लाख रुपैयाँ बराबरको सम्पत्ति खर्च तथा लगानी गरेको पाइएको आयोगले जनाएको छ । यसरी उनको आय र व्ययबीच ५ करोड ७९ लाख ६२ हजार रुपैयाँभन्दा बढीको स्रोत नखुलेको सम्पत्ति देखिएको छ । आयोगले यही बिगो कायम गरी मुद्दा दायर गरेको हो ।
यादवले दशौँ वर्षसम्म निमित्त कार्यालय प्रमुखको हैसियतमा बसेर राजनीतिक तथा विभागीय प्रभावको दुरुपयोग गरी सरकारी सार्वजनिक जग्गा व्यक्तिको नाममा दर्ता गर्ने, प्लट मिलान गर्ने नाममा आर्थिक चलखेल गर्नेलगायतका गैरकानुनी कार्यहरू गरेको अनुसन्धानबाट खुलेको अख्तियारले जनाएको छ । उनले सम्पत्ति विवरण पेस गर्दा समेत वास्तविक सम्पत्ति लुकाएर झुठा विवरण दिएको आयोगको दाबी छ ।
अख्तियारले गैरकानूनी रूपमा आर्जन गरेको सम्पत्ति यादवले आफ्नी पत्नी गायत्री यादव र छोराहरू सुधान्सु यादव तथा शुभम यादवका नाममा समेत खरिद गरेको प्रमाण फेला पारेको छ । यसैले, उनीहरूलाई पनि प्रतिवादी बनाइएको छ र गैरकानुनी सम्पत्ति जफत गर्ने प्रयोजनार्थ मुद्दा दायर गरिएको आयोगले स्पष्ट पारेको छ ।
आयोगले नापी अधिकृत यादवलाई भ्रष्टाचार निवारण ऐनबमोजिम कैद र जरिवाना सजायका साथै गैरकानूनी रूपमा आर्जित सम्पूर्ण सम्पत्ति जफत गर्न मागदाबी गरेको छ । यो घटनाले सार्वजनिक पद धारण गरेका व्यक्तिहरूमाथि हुने भ्रष्टाचार र त्यसको रोकथाममा अख्तियारको सक्रियतालाई थप उजागर गरेको छ ।
