टोकियो – हालै गरिएको एक सर्वेक्षणले हिरोशिमा शान्ति स्मारक संग्रहालय भ्रमण गर्ने ७० प्रतिशतभन्दा बढी विदेशीहरूले सन् १९४५ मा अमेरिकाले हिरोशिमा र नागासाकीमा गरेको आणविक बम आक्रमणलाई औचित्यपूर्ण मान्न नसकिने धारणा राख्ने गरेको देखाएको छ । करिब १ हजार विदेशी आगन्तुकहरूको सर्वेक्षणअनुसार, ७४ दशमलव ६ प्रतिशतले बम विष्फोटलाई अन्यायपूर्ण भनेका छन् । तीमध्ये ६ दशमलव २ प्रतिशतले संग्रहालयको अवलोकनपछि आफ्नो दृष्टिकोण परिवर्तन भएको बताएका छन् । सर्वेक्षणमा सहभागीमध्ये ७ दशमलव २ प्रतिशतले बम विष्फोटलाई न्यायोचित ठहराएका थिए भने १२ दशमलव ८ प्रतिशत अनिश्चित थिए ।
अमेरिकीहरूमध्ये १३ दशमलव ३ प्रतिशतले बम विष्फोटलाई न्यायोचित भनेका छन्, जुन समग्र उत्तरदाताहरूको तुलनामा झण्डै दोब्बर हो । यद्यपि, ४८ दशमलव ५ प्रतिशत अमेरिकीले यसलाई गलत मानेका छन् । उल्लेखनीय रूपमा, ८ दशमलव २ प्रतिशत अमेरिकीले संग्रहालय भ्रमण गरेपछि आफ्नो पहिलेको धारणा परिवर्तन गर्दै बम विष्फोटको समर्थन नगर्ने विचार बनाएको बताएका छन् । संग्रहालयका अनुसार, आर्थिक वर्ष २०२४ मा संग्रहालय भ्रमण गर्ने विदेशीहरूको संख्या ७ लाख २० हजार नाघेको छ, जुन सन् १९५५ मा यसको स्थापनापछिकै सबैभन्दा उच्च हो ।
संग्रहालय भ्रमण गर्नुको मुख्य कारणहरूमा (एकभन्दा बढी उत्तर छनोट गर्न मिल्ने गरी सोधिएकोमा) ७५ दशमलव ४ प्रतिशतले विद्यालयमा बम विष्फोटबारे पढेको बताएका छन् । त्यसपछि, ४५ दशमलव ७ प्रतिशतले किताब पढेको वा चलचित्र हेरेको र ४४ दशमलव ९ प्रतिशतले विश्वव्यापी आणविक मुद्दाहरूप्रति चिन्तालाई कारण मानेका छन् । जापानको आणविक बम पीडितहरूको अग्रणी समूह निहोन हिदान्क्यो ले सन् २०२४ को नोबेल शान्ति पुरस्कार जितेको वा सन् २०२३ मा हिरोशिमामा भएको जी-७ नेताहरूको शिखर सम्मेलनलाई ५ प्रतिशतभन्दा कमले मात्र आफ्नो भ्रमणको कारण बताएका छन् ।
अहिले विश्वमा करिब १२ हजार आणविक हतियार रहेको अनुमान छ । आणविक उन्मूलनबारे सोधिएको प्रश्नमा, ५५ दशमलव ६ प्रतिशतले यो आवश्यक रहेकोमा सहमति जनाएका छन्, जबकि ३५ दशमलव ९ प्रतिशतले यो आवश्यक भए पनि वर्तमान परिस्थितिमा कठिन रहेको स्वीकार गरेका छन् । केवल ३ दशमलव प्रतिशतले यस्ता हतियारहरू उन्मूलन गर्न नहुने बताएका छन् ।
आणविक हतियार भएका देशहरूका ३९४ उत्तरदाताहरूमध्ये ४६ दशमलव ४ प्रतिशतले आणविक हतियार उन्मूलन गर्नुपर्ने बताएका छन् । त्यस्तै, ४३ दशमलव १ प्रतिशतले यो आवश्यक भए पनि कठिन रहेको र ४ दशमलव १ प्रतिशतले उन्मूलनको विपक्षमा रहेको धारणा राखेका छन् । यो सर्वेक्षण जुन र जुलाई महिनामा संग्रहालय भ्रमणपछि क्यूआर कोड स्क्यानमार्फत गरिएको थियो, जसमा ६२ देश र क्षेत्रका १,००० व्यक्तिहरूबाट मान्य प्रतिक्रियाहरू प्राप्त भएका थिए । –क्योदोको सहयोगमा
