काठमाडौँ – सेभेन–इलेभेन जापानका संस्थापक तथा जापानको खुद्रा व्यापार क्षेत्रमा ठूलो परिवर्तन ल्याउने व्यक्तित्व तोशिफुमी सुजुकीको ९३ वर्षको उमेरमा निधन भएको छ । उनको मे १८ मा हृदयघातका कारण निधन भएको हो । उनको निधनबारे सेभेन एन्ड आइ होल्डिङ्सले सोमबार टोकियोमा जानकारी दिएको हो । सुजुकीले सन् १९७३ मा अमेरिकी ब्रान्ड ‘सेभेन–इलेभेन’ लाई टोकियोमा भित्र्याएर जापानको खुद्रा व्यापार क्षेत्रमा नयाँ युग सुरु गरेका थिए ।
उनले तथ्यांकमा आधारित सामान व्यवस्थापन प्रणाली लागू गर्दै छिटो बिक्री हुने सामग्री र तयार खानामा विशेष ध्यान दिएका थिए । उनको व्यावसायिक रणनीतिका कारण जापानी कम्पनीले सन् १९९० को दशकको सुरुआतमा आर्थिक संकटमा परेको अमेरिकी मातृ कम्पनी साउथल्यान्ड कर्पोरेशनलाई समेत बचाउन सफल भएको थियो ।
सन् २०१६ मा अध्यक्ष पदबाट अलग भए पनि उनको प्रभाव अहिले पनि जापानभरका सुविधा पसल (कन्भिनियन्स स्टोर) प्रणालीमा स्पष्ट रूपमा देखिन्छ । आज पनि ती पसलहरू जापानी जनजीवनको महत्वपूर्ण आधारका रूपमा रहेका छन् ।
