टोकियो – जापानी प्रधानमन्त्री सानाए ताकाइचीले बिहीबार जापानी कम्पनीहरूलाई आगामी वर्ष हुने वार्षिक तलब वार्तामा मुद्रास्फीति (महंगी) भन्दा माथि हुने गरी तलब वृद्धि गर्न आग्रह गरेकी छिन् । सरकारले आर्थिक वृद्धिलाई तीव्रता दिन ‘जिम्मेवार तर आक्रामक’ वित्तीय नीतिहरू अघि बढाइरहेको सन्दर्भमा प्रधानमन्त्रीको यो भनाइ आएको हो ।
जापानको सबैभन्दा शक्तिशाली व्यावसायिक लबी ‘केइदानरेन’द्वारा आयोजित एक बैठकलाई सम्बोधन गर्दै प्रधानमन्त्री ताकाइचीले भनिन्, ‘म व्यवसायी नेताहरूलाई पुनः आग्रह गर्दछु कि उनीहरूले आधारभूत तलबमा यस्तो वृद्धि सुनिश्चित गरून्, जुन बढ्दो बजार भाउले अवमूल्यन नहोस् ।’
वित्तीय नीतिमा लचिलो मानिने ताकाइचीले नागरिकको क्रयशक्ति बढाउनमा जोड दिएकी छिन् । गत अक्टोबरमा जापानको पहिलो महिला प्रधानमन्त्री बनेकी ताकाइचीको लक्ष्य करको दर नबढाई सरकारी राजस्वमा वृद्धि गर्नु हो । निरन्तर बढ्दो महंगीले वास्तविक ज्याला वृद्धिलाई पछि पारिरहेको वर्तमान अवस्थामा उपभोग सुधार गर्नु सरकारको प्रमुख चुनौती बनेको छ ।
सोही कार्यक्रममा बोल्दै ‘केइदानरेन’ (जापान बिजनेस फेडरेशन) का प्रमुख योशिनोबु चुत्सुईले लबीका सदस्यहरूले ‘तलब वृद्धिको यो बलियो गतिलाई थप संस्थागत र निरन्तरता दिन काम गर्ने’ प्रतिबद्धता व्यक्त गरे । जापानमा व्यवस्थापन पक्ष र श्रमिक युनियनहरूबीच हुने वार्षिक तलब वार्ता, जसलाई ‘शुन्तो’ भनिन्छ, आगामी वर्षको सुरुमा प्रारम्भ हुने तय भएको छ । जापानका धेरैजसो प्रमुख कर्पोरेसनहरूले मार्च महिनामा आफ्नो वार्षिक आर्थिक हिसाब-किताब बन्द गर्ने गर्दछन् ।
